Elektrondy qyzmetti damytý – bul álemdegi medısınalyq qyzmet kórsetýdiń jańa deńgeıi. Búginde «Densaýlyq» memlekettik baǵdarlamasyna sáıkes, eldiń medısınalyq servısine ınnovasııalar engizý zaman talabyna saı jańa kezeńge kóterilgen. Osyǵan baılanysty bıyl óńirde «Vıenna» JShS kompanııasy men oblystyq densaýlyq saqtaý basqarmasy «SOS qyzmetimen dıstansııaly bosanýǵa deıingi patronaj» birlesken jobasyn iske qosqan bolatyn. Densaýlyq saqtaý basqarmasynyń basshysy Erjan Nurlybaev málimdegendeı, atalǵan joba «Densaýlyq» baǵdarlamasynyń talaptaryna tolyq jaýap beredi jáne júktilik kezindegi ana men bala ólimine tosqaýyl bolmaq.
«Búginde bul qosymshany 700-den astam júkti analar paıdalanyp otyr. Qaraǵandy oblysy nárestelerdiń shetineýi boıynsha 7-oryn jáne 1000 nárestege shaqqandaǵy ana ólimi boıynsha 5-oryn alady. «SOS qyzmetimen dıstansııaly bosanýǵa deıingi patronaj» osy kórsetkishterdi júktilik kezinde de, bala týǵannan keıin de 42 kún boıy jaqsartýǵa baǵyttalǵan. Baǵdarlamany kez kelgen aıaǵy aýyr ana uıaly telefonyna tegin júkteı alady. Onda aldyn alý sharalaryna baılanysty tolyq aqparat, pasıent pen dárigerdiń yntymaqtastyǵyn jaqsartý, jedel járdem qyzmetiniń sapasyn arttyrý kózdelgen», deıdi Qaraǵandy qalasyndaǵy №4 emhananyń dırektory Saltanat Shaıdarova.
Júkti áıeldiń jaǵdaıyn baqylaý, naqty turǵylyqty jerin bilý, jedel kómek kórsetý smartfon nemese planshetke mobıldi qosymsha ornatý arqyly júzege aspaq. Qosymshada dárigerge arnalǵan vırtýaldy jumys kabıneti jasaqtalǵan. Onda dáriger qaralýshynyń barlyq derekterin kóre alatyn bolady. Jalpy, oblystyq densaýlyq saqtaý basqarmasynyń derekterine súıensek, jyl saıyn óńirde 22 myń 500 bala dúnıege keledi. Náreste ólimi 6,9 paıyzǵa tómendegen. Bul kórsetkishter atalǵan qosymsha arqyly taǵy da jaqsara túsedi degen senim bar.
Mıras ASAN,
«Egemen Qazaqstan»
QARAǴANDY