Qaharmandyqty qasterleý

Qyryq jyldyq tarıhy bar № 26 gımnazııa - Chelıabi qalasyndaǵy tańdaýly bilim ordalarynyń biri. Gımnazııa tek sońǵy jyldar ishinde birneshe ataýly memlekettik granttardy jeńip aldy. Munda oqýshylarǵa sapaly bilim berýdiń ózindik oń tájirıbeleri qalyptasqan. Gımnazııa oqýshylary Búkilreseılik, oblystyq jáne qalalyq olımpıadalarda júldeli oryndarǵa ıe bolyp, udaıy jeńimpaz atanyp keledi. Mektep dırektory Tatıana Shıshkınanyń aıtýynsha, gımnazııada jalpy bilim berýmen qatar, oqýshy tulǵasynyń jan-jaqty, jarasymdy jetilýine de aıyryq­sha mán beriledi. Ásirese shákirt­terdi basqa halyqtardyń tarıhy­men, mádenıetimen, dás­túr-salty­men keńirek tanys­tyrý arqyly olarǵa Reseı sııaq­ty kóp ultty memlekette qa­ly­p­tasqan ulys­ara­lyq qatyna­s­tar­dyń, kórshi mem­lekettermen óz­ara dostyq baı­lanystyń ma­ńyzyn uǵyn­dy­rý­ǵa múmkindik jasalýda. Máselen, jaqynda Chelıabi qa­zaq­tarynyń oblystyq «Azamat» qoǵamdyq ortalyǵynyń bas­tama­symen osy gımnazııada Keńes Odaǵynyń Batyry Baýyr­jan Mo­myshulyn eske alý keshi bo­lyp ótti. Oǵan Chelıabi oblysy Bilim jáne ǵylym mınıstriniń birinshi orynbasary E.Koýzova bas­tap, qalalyq jáne qala aý­dan­da­ryndaǵy bilim bas­qarmalarynyń birqatar qyz­met­ker­l­eri, jergilikti qazaqtar, gımnazııa ustazdary men shá­kirtteri qatysty. Shákirtterge ne­gizinen aq­pa­rat­tyq-fılo­lo­gııa­lyq, lıngvıs­tı­ka­lyq-aqparattyq jáne áleýmettik-ekonomıkalyq be­ıinde bilim beretin gımnazııa ujymy ázirlegen atal­mysh kesh aıasynda qazaq hal­qy­nyń dańqty perzenti – Baýyr­jan Mo­mysh­uly­nyń azamattyq hám jaýyn­gerlik ómir joly jan-jaqty kórsetildi; qatysýshylar onyń ańyzǵa aınal­ǵan erlikteri haqynda júrek­jar­dy sózder aıtty. Sondaı-aq osy keshte mektep oqýshylary arasynda ótkizilgen «Chto ıa znaıý o Baýrjane Momysh­ýly» dep atalatyn shy­ǵar­ma­shy­lyq jumystardyń qalalyq kon­kýrsy márege jetti. Konkýrsqa qala mektepteriniń otyzdan astam oqýshysy qatysty. Shyǵarma sa­ıy­syna túskenderdiń basym kóp­shiligi – №26 gımnazııanyń shá­kirt­teri. Nátıjesinde olardyń jeteýi júldeli orynǵa ıe boldy. Al 11 synyp oqýshysy Vera Odnokozovanyń shyǵarmasy eń úzdik dep tanyldy. – Oqýshylar shyǵarmaǵa jan-jaqty daıyndaldy, – deıdi gımnazııa kitaphanasynyń meńgerý­shisi Va­­lentına Terına. – Olar Baýyr­jan Momyshuly týraly ádebıet­ter­di oqydy, fılmderdi kórdi. Me­niń ózim oqýshylarǵa Baýyrjan Mo­myshulynyń «Moskva úshin shaı­qas», «Ushqan uıa» kitaptary boıyn­sha birneshe ret áńgime ótkizdim. Sol shyǵarmalardyń keıbireýlerine kóz júgirteıik: «Meni Baýyrjan Momysh­uly­nyń ómiri men erligi asa qyzyq­tyrdy, – dep jazady 8-synyp oqý­shysy Ekaterına Bender. – О́limnen de, oqtan qoryqpaǵan osy batyrlar týraly áli de bile túskim keledi. Olar týǵan eli men álem halyqtarynyń beıbit ómirin qor­ǵa­dy, bul er­lerdiń esimin biz máń­gi­lik jú­re­gi­mizde saqtaýymyz kerek». 11-synyp oqýshysy Oleg Terın bylaı deıdi: «Otan qorǵaý­shy­lar erligi ur­paq­tar­dyń esinde máń­­­gi­­lik qalady. Olar­dyń esimin ja­d­y­myzda ustap, janqııar­lyq erlikterine taǵzym ete otyryp, biz mundaı isterdiń qasıetti mindettilik qana emes, tarıhtyń uly oqıǵalaryna aralasqan baqytty múmkindik ekendigin de umyt­paýymyz kerek». «Qazaqstan – meniń bir Ota­nym, – dep tolǵanady 11-synyp oqý­shy­sy Irına Antonova. – Men Qos­ta­naı qalasynda týdym, keıin otb­a­symyz Reseıge qonys aýdar­dy. Qa­zaq­stan­nyń baı tarıhy men máde­nıeti bizdiń júregimizde máńgilik izin qaldyrdy. Balalyq shaǵymnyń esten ketpeıtin eń qyzyqty kezeń­derin osy elmen baılanystyramyn. Kishken­ta­ıym­­nan orys mádenıeti­men birge, qa­zaq mádenıetin de bo­ıyma sińir­genimdi maqtanysh tuta­myn... Áli esimde, bala kezimde múl­de tanys emes bir adamnyń eskertkishin kórdim. Eseıe kele sura­sam, ol Uly Otan soǵysy­nyń qahar­many Baýyrjan Momysh­ulynyń eskertkishi eken. Osy­dan keıin men ol týraly áde­bıet­terdi oqı bas­tadym. Sóıtip, Baýyrjan esi­min árbir adam bilýge tıis dep túı­dim... «Strana doljna znat svoıh geroev!» deı­di Reseıde. Baýyr­jan esimi naq osy Reseı halqynyń tarıhı jadynda bolý­ǵa tıis... Toǵy­zyn­­shy mamyrda Qazaq­stan­daǵy áje­me kel­gen kezimde, mindetti túr­de Baýyr­jan Momysh­uly­nyń eskertkishine gúl shoǵyn qoıamyn...». Al eń úzdik shyǵarmanyń ıesi Vera Odnokozova óz oıyn bylaı túıindepti: «Bizde Uly Otan so­ǵy­sy týraly Jeńis kúni qar­sańynda ǵana oılanatyn ádet bar. Bul múlde durys emes. Bú­gingi qol jetkizgen jaqsy ómirimiz ben barsha ıgiligimiz – soǵys batyr­lary­nyń jeńimpazdyǵymen keldi. Oqýlyqtarda jazylǵan esimderdi ǵana emes, fashızmge qarsy soǵys­qan árbir adamdy men soǵys qa­har­many dep esepteımin. Baýyr­jan Momyshulynyń erligi – búkil Keńes Odaǵynyń erligi. Mundaı adamnyń esimin eshqashan umytpaı este saqtaýymyz kerek!». Belgili rejısser Qalıla Omar­ov­tyń «Qazaqtyń Baýyr­ja­ny» derekti fılmin «Azamat» qoǵamdyq ortalyǵy óz basta­masy­men orys tiline aýdaryp, reseılik kórermenderdiń qabyldaýyna yń­ǵa­ıl­aǵan eken, kesh sol shyǵar­ma­men túıindeldi. Serikqalı BAIMENShE, «Egemen Qazaqstan» – Máskeýden.