Stýdentterge memlekettik grant berildi

Ulttyq biryńǵaı test ómi­ri­mizge etene enip ketkeli qashan. Osy test bir balanyń baǵyn jan­dyrsa, ekinshisiniń jolyn baılap jatady. Baǵy janǵany belgili. Al joly baılandy degende neni aı­typ otyrmyz? Máselen, talapker 100 baldan artyq jınaıdy. Biraq konkýrstyń joǵarylyǵynan álgi jınaǵan baly iske aspaı qalady. Qysqasy, synaqtan qulaıdy. Degenmen, esil eńbek pen jıǵan bilim dalaǵa ketpeýi úshin aqyly negizde oqýǵa túsedi. Keler jyly tapsyrý úshin, oǵan ýaqyt ketedi. Bir jyldan keıin bıylǵy bilim kómeskilenip, mıdan óshe bas­taı­dy. Sonymen bilim-biligine qara­mas­tan bala aqyly negizde oqýǵa májbúr bolady. Osy arada balanyń taǵdyryna memleket aralasyp jatyr. Qalaı dersiz? Birinshi kýrstyń qysqy já­ne jazǵy emtıhany kezinde UBT-dan joǵary ball jınaǵan, oqýǵa aqyly negizde túsken, so­ny­men qatar emtıhandy jaqsy ba­ǵaǵa tapsyryp, óziniń alǵyr­ly­ǵymen kózge túsken stýdentterge memleket arnaıy bilim grantta­ryn bóledi. Keshe ǵana aqyly negizde oqyp, ata-anasynyń qalta­syna túsip otyrǵan bala bir kún­de memlekettik grantqa aýysady. Osyndaı qýanyshty jaǵdaı Qor­qytata atyndaǵy memlekettik ýnıversıtetinde de oryn aldy. Júzderi bal-bul janǵan, shoq-shoq gúl qushaqtaǵan stýdentter­diń qýanyshy qoınyna syımaı júrgeni birden baıqalady. Al árbir stýdenttiń janynda júrgen ata-ananyń tebirenisi tipti bólek. Perzentteri alqashqy synaqta sú­ringenimen, ózderiniń bilim-biligin dáleldeı otyryp, memlekettik grantqa ıe bolyp jatyr. – Elbasy Nursultan Nazarbaev negizinen úsh memlekettik baǵ­darlamany nazarda ustaıdy. Olar – densaýlyq saqtaý, bilim berý, til máseleleri. Jyl saıyn joǵary oqýǵa túskisi keletin talapkerlerge 35 myń grant bólinedi. Árıne, grantqa ilinbeı qalǵan, biraq jo­ǵarǵy ball jınaǵan balalar qaı aımaqtan bolsa da tabylady. Son­dyqtan, 2009 jyldan bastap El­basynyń tikeleı tapsyrma­sy­men respýblıka boıynsha qosym­sha granttar bólinetin boldy. Búgin biz aqyly negizden memlekettik grantqa aýysqan 44 stýdentti marapattaǵaly otyrmyz, – dedi Qorqytata atyndaǵy memlekettik ýnıversıtettiń rektory Baı­zaq Momynbaev. 44 stýdent memlekettik grant­qa ıe boldy. Bul – 44 taǵdyrdyń ómirine qýanysh kirip, memleket­tiń ystyq alaqanyn sezindi degen sóz. Mundaı jaqsylyq, shýaqty kún­der umytylmaıdy. Sondyq­tan osy stýdentter erteń maman retinde el damýyna zor úles qo­sa­tyny da shyǵar kúndeı aqıqat. Erjan BAITILES. Qyzylorda.