Oblys ortalyǵyndaǵy Máshhúr Júsip ortalyq meshitinde ótken qolóner baıqaýyna aýyl-qala meshitteriniń tyńdaýshylary, qyz-kelinshekter qatysty. Jalpy, meshitte kúndelikti ǵıbratty, rýhanııaty mol, ımandylyq jolyndaǵy sharapaty mol túrli sharalar ótip turady.
Hadıste «Jaqsylyq jasap jarysyńdar» deıdi. Al bul jolǵy baıqaýdyń maqsaty – ultymyzdyń asyl qazynasyn saqtaý, urpaqqa mıras etý. Ulttyq oıý-órnekter, toqyma toqý, keste tigý, qaǵazdan jáne basqa da materıaldardan buıymdar, qolóner buıymdaryn jasaý. Baıqaý barysynda kóz qyzyqtyrar kórpesheler, jastyqtar, kesteli súlgiler, oıý-órnekpen zerlengen oramaldar, dastarqan jaımasy men qoldan kestelengen shyt, toqylǵan keýdesheler, bas kıimder, bısermen ádiptelgen áshekeılerdi kórdik.
Ortalyq meshitke kelýshiler de baıqaýǵa ákelingen qolóner buıymdaryn tamashalady. Mysaly, Sapýra apa, Aqerke Turǵynbaı, Sabına Muratqyzy, Záýre Shamsıdınqyzy jáne Álııa apaılar apta saıyn meshitke kelip, qyz-kelinshekterge tiginshilik, kesteleý, oıý-órnekterdi oıýdy úıretedi. Al Aqerke Dáýitova bısermen, Quran kitaptaryna arnalǵan túrli tastarmen áshekeılengen sómkeler jasap, baıqaýda ekinshi oryn aldy. Sonymen birge, Nazgúl Tortaı toqylǵan sebet, vaza, qaǵazdan jasalǵan qobdısha usynyp, «Qaǵazdan jasalǵan buıym» boıynsha birinshi oryn alsa, Gúlbahyt Qansyzbaı «Qazaq órnekteri» atalymynda úzdik dep tanyldy. Jáne de toqyma aıaq kıim – etik, týflı tigedi eken. Ortalyq meshittegi Aqerke Turǵynbaı ustazdyń shákirtteri Gúlsim Amanjol, Búldirgen Habı, Gaýhar Musa tańǵalarlyq «Qazaq oıý-órnekterinde» oıý oıyp erekshe kózge tústi.
Meshittiń kitaphanashysy Nazym Shaıkenova: «Jaratylystyń ózi sulýlyq syılaǵan áıelderdiń qııaly sheksiz, al shyǵarmashylyq qabiletteri odan da keremet!», – deıdi.
Farıda BYQAI,
«Egemen Qazaqstan»
PAVLODAR
Sýretti túsirgen
Amantaı TOIShYBAI