Qazaqstannyń 25 jyl ishinde jetken jetistigi ózbek halqyna jaqsy tanys. Kezinde Keńes Odaǵynyń quramynda bolǵan bul el óz táýelsizdigin alǵannan keıingi az ýaqyttyń bederinde turalap qalǵan ekonomıkasyn qalpyna keltirdi, damýda oń sekiris jasap, osy óńirdegi basqa memlekettermen salystyrǵanda kósh ilgeri ketti.
Bul, birinshi kezekte, Qazaqstan Respýblıkasynyń Prezıdenti Nursultan Nazarbaevtyń eńbegi. Ol parasatty kóshbasshy, tájirıbeli saıasatker retinde Qazaqstan damýynyń ártúrli kezeńinde memlekettik júıeni qurý men ony qalyptastyrýda durys qadam jasaýǵa tyrysty, bul qadamdar elde bar mańyzdy resýrstardy tıimdi paıdalana otyryp, alda turǵan mindetterdi sheshýge aıtarlyqtaı dárejede yqpal etti.
Sol kezde, árıne, óz aıaǵynan nyq tura qoımaǵan jas memlekettiń damýy úshin bıliktiń Prezıdenttiń mańaıyna shoǵyrlanǵany mańyzdy edi. Sebebi, N.Nazarbaev júrgizgen saıasattyń nátıjesinde eldi jańǵyrtýdyń birinshi jáne ekinshi kezeńinen sátti ótýge, sol arqyly álemniń 50 damyǵan eliniń quramyna kirýge jol ashyldy.
Alaıda, ómirdiń bir orynda turmaıtyny belgili. Al jahandaný zamany alǵa tartqan ózgerister múldem jańa qadamdarǵa barýdy talap etýde. Osy oraıda, Qazaqstan da óz aldyna aýqymdy maqsat-mindetter qoıyp, 2050 jylǵa qaraı, «2050» Strategııasy arqyly 30 damyǵan, básekege qabiletti elderdiń qataryna enýdi kózdep otyr.
Qazirgi tańda birtindep iske asyrylyp kele jatqan «Nurly jol» baǵdarlamasy men «100 naqty qadam» – Ult jospary osy maqsatty júzege asyrýǵa baǵyttalǵan. Degenmen, buǵan qol jetkizý qazirgi basqarý tetigin jetildirýsiz jáne bıznes-ortanyń kókjıegin keńeıtýsiz áste, múmkin emes.
Eldi jahandyq turǵyda básekege qabiletti etýge, sondaı-aq, Tórtinshi óndiristik revolıýsııa deńgeıine kóterýge bastaıtyn Qazaqstannyń Úshinshi jańǵyrýy ekonomıkalyq ósýdiń jańa modelin ázirleýdi talap etýde. Sol sebepti, qazirgi tańda memleket ózin jaqsy menedjer retinde kórsete alýy kerek. Al bul rette Qazaqstan kóshbasshysynyń alysty boljaı biletin kóregendigi kezekti márte tańdanys týǵyzýda.
Joldaý – bul tek aldaǵy ýaqytta memleket umtylatyn «basymdyqtar shoǵyry» ǵana emes, onda tereń taldaý-saraptaý negizinde qazirgi jaǵdaı men eldiń ekonomıkalyq ál-aýqatyn aıqyndap, barlyq baǵyttar boıynsha memleketti damýǵa alyp keletin keshendi ádis-tásilder kórsetilgen.
Osy oraıda, men Joldaýda aıtylǵan ınstıtýttyq qaıta jańarýlar máselesine aıryqsha toqtalar edim. Sebebi, Prezıdenttiń óz ókilettikteriniń biraz bóligin Parlament pen Úkimetke berýi, sol arqyly bılik tarmaqtary arasyndaǵy teńgerimdilik júıesin qurýy olardyń jaýapkershiligin, sáıkesinshe, jumys tıimdiligin arttyratyn bolady. 25 jyldyń ishinde Qazaqstan qoǵamynyń ózine tán júıesi qalyptasty, al ol dál osyndaı reformalardy júzege asyrýǵa oń áser etetini sózsiz.
Biz Qazaqstan jetken tabystarǵa shynaıy qýanamyz. Qazaqstanda ınstıtýttyq reformalardyń sátti júzege asyrylýy kórshiles elderge tek oń yqpal etip qana qoımaı, jalpy alǵanda, Ortalyq Azııa aımaǵynyń damýyna da ózgeshe serpin beredi dep oılaımyn.
Alısher ALIMOV,
sarapshy