Áýe tasymaly zańdyq sıpat aldy

Keshe Senat Tóraǵasy Qasym-Jomart Toqaevtyń jetekshiligimen ótken palatanyń kezekti jalpy otyrysynda Aýǵan­stan Islam Respýblıkasynyń turaqtylyǵyn qamtamasyz etý­ge qatysty jalǵyz másele qaraldy. Zań jobasynyń tolyq ataýy «Qazaqstan Respýblıkasynyń Úki­meti men Amerıka Qurama Shtat­ta­rynyń Úkimeti arasyndaǵy Aýǵanstan Islam Respýb­lı­ka­sy­nyń qaýipsizdigin, turaqtylyǵyn jáne ony qaıta qalpyna keltirýdi qamtamasyz etý jónindegi is-qımylǵa Amerıka Qurama Shtat­tarynyń qatysýyna baılanysty Qazaqstan Respýblıkasynyń aýma­ǵy arqyly ótetin júk pen per­sonaldyń áýe tranzıti týraly kelisimdi ratıfıkasııalaý týraly» dep atalady. Atalǵan zańdyq qujat boı­ynsha baıandamany Syrtqy ister mınıstriniń orynbasary Qaırat Omarov jasady. Onyń máli­me­ti­ne qaraǵanda, búginge deıin elimiz aýmaǵy arqyly 10 myńǵa jýyq tranzıttik reıs jasalǵan. Kelisim bekigen jaǵdaıda buǵan deıin qol qoıylǵan ózara túsinistik týraly memorandým kúshin joıa­tyn bolady. Sondaı-aq qujat Aýǵanstandaǵy turaqtylyqty qam­tamasyz etýge jáne Ortalyq Azııadaǵy qaýipsizdikti ornatýǵa yqpal etetini erekshe atap ótildi. Mınıstr sóz sońynda Aýǵan­stan­daǵy koalısııalyq kúshterge qol­daý kórsetý ulttyq qaýipsizdikke sáıkes kelerin nazarǵa saldy. Qosymsha baıandama jasaǵan Halyqaralyq qatynastar, qorǵa­nys jáne qaýipsizdik komıtetiniń tóraǵasy Qýanysh Sultanov elimiz bul máselege úlken mán berip otyrǵandyǵymen bólisti. Senator elimizdiń moınyna alǵan mindettemelerin naqty istermen dá­lel­deýi abyroıy men bedelin kóte­rýge yqpal etetin bolady degendi basa aıtyp ótti. Zań jo­basy depýtattar tarapynan bir­aýyzdan qoldaý taýyp, qabyl­dandy. Asqar TURAPBAIULY.