FRANSÝZDAR QARAR AIаSYNA SYIMAIDY
Fransııa qorǵanys mınıstri Jerar Longe óz eli, AQSh jáne Ulybrıtanııa BUU Qaýipsizdik Keńesi aıqyndaǵan qarar ókilettigi sheńberin keńeıtý nıetteri bar ekenin málimdedi. Atap aıtqanda, mınıstr polkovnık Mýammar Kaddafıdiń bılik basynda qalýyna budan ári tózýge bolmaıdy degen batys lıderleriniń málimdemesi halyqaralyq mandat aýqymynan asyp ketetinin atap kórsetti.
Sonymen qatar, Longe koalısııa elderi is júzinde BUU mandatynan artyq qadamdarǵa baryp otyrǵanyn málimdedi jáne buǵan ózi eshqandaı alańdaýshylyq tanytpaıtynyn jasyrmady. Onyń pikirinshe, BUU Qaýipsizdik Keńesi atalǵan máselege baılanysty mandat ókilettigin keńeıtetin taǵy bir qarar qabyldaýy yqtımal. Áıtpese, M.Kaddafıdiń bılik basynan óz erkimen ketetin túri kórinbeıdi.
RESMI SALTANATQA QATYSA ALMADY
Ulybrıtanııa patshaıymy Elızaveta II Vındzorda ótken Vıktorııa ordenderin tapsyrý saltanatyna qatysa almady. Keıin belgili bolǵanyndaı, patshaıymnyń murnynan qatty qan ketken. Sóıtip, ol sońǵy bes jylda alǵash ret resmı saltanatty ótkizip jiberýge májbúr boldy.
Jasy káriliktiń dender shaǵyna jetken patshaıymnyń syrqatyna ne sebep bolǵany ázirshe belgisiz. Biraq otbasylyq medısınanyń mamany Elızavetanyń densaýlyǵynda alańdatarlyqtaı sımptomdardyń joq ekenin aıtyp otyr. Al qan ketý aǵzanyń jalpy qartaıýynyń belgisi, deıdi ol. Osy aralyqta elde bolashaq taq murageri týraly áńgime gýleı bastady.
QASTANDYQQA DAIYNDALǴANYN MOIYNDADY
Soltústik Koreıada tutqyndalǵan AQSh azamaty Chon En Sý KHDR-ǵa qarsy qylmystyq áreket daıyndaǵanyn moıyndady. Ol kúdikti retinde 2010 jyldyń qarashasynda qamaýǵa alynǵan bolatyn. Biraq onyń naqty qandaı qastandyq jasaǵysy kelgeni týraly esh nárse aıtylmaıdy.
Chon En Sýdyń qamaýǵa alynǵany týraly habardy AQSh syrtqy saıasat vedomstvosy Shvesııanyń Phenıandaǵy elshiliginen bilgen. Al 2009 jyly KHDR-ǵa qarsy qylmys jasamaq boldy degen kúdikpen eki amerıkalyq jýrnalıst tutqyndalǵan bolatyn. Olar sol sátinde-aq 12 jylǵa bas bostandyqtarynan aıyrylǵan edi. Amerıkalyq taǵy bir azamat – Aıhalon Malı Gomes te osyndaı kúdikpen 2010 jyly ustalǵan-tyn.
О́Z MINDETTEMELERINE ADALDYQ TANYTPADY
Qyrǵyzstanda bıleýshi koalısııaǵa kiretin úsh partııanyń ekeýi koalısııalyq kelisimge baılanysty jasaǵan óz mindettemelerin keri shaqyryp alatyndary týraly málimdeme jasady. Mundaı úndeýdi «Respýblıka» jáne Qyrǵyzstan sosıal-demokratııalyq partııasy taratty.
Úndeý avtorlarynyń aıtýlaryna qaraǵanda, alıanstyń ydyraýyna úshinshi áriptes – «Ata-Jurt» partııasy jaýapty. Partııaaralyq túsinbestikke azamattardyń parlamenttik koalısııa men úkimetke teris kózqarastary sebep bolǵan degen de pikir bar. Atalǵan úshtik 2010 jyldyń kúzinde ótken parlamenttik saılaýdan keıin jasaqtalǵan bolatyn. Biraq úsh qoshqardyń basy bir qazanǵa syımaı qalǵan sııaqty.
QARÝLY JASAQTARDYŃ KО́ZI JOIYLDY
Tájikstannyń shyǵysynda kúsh qurylymdary qyzmetkerleri men qarýly jasaqtar arasynda qaqtyǵys boldy. Aldyn ala derek boıynsha, eki jaqtan da shyǵyn bar kórinedi. Alaıda shyǵyn sany ár derekterde ártúrli aıtylady.
2010 jyldyń kúzinde de eldiń atalǵan aýmaǵynda osyndaı operasııa júrgizilgen bolatyn. Sonyń barysynda onnan astam qarýly jasaq múshesi óltirilgen bolsa, jıyrmadan astamy qolǵa túsken edi. Al qarýly jasaq kósemderiniń biri Mýllo Abdýllo bas saýǵalap úlgergen-tin. Sońǵy qarýly qaqtyǵys sonyń jasaqtarymen bolýy yqtımal.
QÝATTY JARYLYSTYŃ SALDARY AÝYR
Tashkent oblysynyń Qarasý kentinde qatty jarylys boldy. Jergilikti turǵyndardyń sózderine qaraǵanda, jarylysqa turmystyq gaz sebep bolǵan. Gaz jergilikti maqta zaýytynyń jumysshylary turatyn eki qabatty úıde jarylǵan.
Jarylys saldarynan 11 adam opat bolsa, taǵy birneshe adam aýyr jaraqattarymen aýrýhanaǵa túsken. Al qaza tapqandar men zardap shekkender týraly resmı málimet joq. «Ferǵana» aqparat agenttiginiń habarlaýynsha, jergilikti BAQ jarylysqa mán bermegen. Agenttik sondaı-aq mundaı oqıǵalarǵa baılanysty jergilikti BAQ aqparat bermeıtinin atap kórsetti. Bıliktiń pikirinshe, deıdi agenttik, mundaı aqparattar respýblıkadaǵy tynysh ómir sıpatyn buzady.
QYSQA QAIYRYP AITQANDA:
Chehııanyń ońtústigindegi Dýkovana AES-iniń 4 energoblogynyń birinde radıoaktıvti sýdyń syrtqa ketýine baılanysty elektrostansa jumysy toqtatyldy. Jergilikti mamandar aýaǵa zııandy zattar taramaǵanyn kóldeneń tartyp otyr.
Qytaıdyń soltústik-shyǵysynda 33 jastaǵy Chjoý Iýısın otbasy múshelerin qosa alǵanda, ózi ıelik etetin monsha men kólik jýý ornynda jumys isteıtin tórt adamdy atyp óltirdi. Onyń qolynan barlyǵy 10 adam kóz jumdy. Sebep anyqtalýda.
Japonııanyń «Fýkýsıma-1» AES-iniń operatory stansadaǵy apat saldarynan úılerin tastap shyǵýǵa májbúr bolǵan otbasylaryna ótemaqy tóleıtin boldy. Sóıtip, ár otbasyna 12 myń AQSh dollarynan aqsha tımek.
Internet materıaldary negizinde ázirlendi.