Almatyda eki aptadan keıin elektravtobýstar synaq tártibinde júre bastaıdy. Bul týraly "Almatydaǵy elektrkólik. Sholý men perspektıvalar" atty dóńgelek ústel barysynda belgili boldy.
Avtobýstar ázirshe tramvaı deposynda qýat alady.
"Avtobýs tańda jelige shyǵýy úshin qýat alýy kerek, ıaǵnı belgili bir qýat kerek. Meniń bilýimshe, elektravtobýstardyń qýaty 70 shaqyrymǵa jetedi. Sáıkesinshe, ol ár aınalymda qýat alyp otyrýy kerek. Sondyqtan sońǵy aıaldamalarda qýat kózi bolýy tıis. Qazir biz qýat kózin qaıda ornatýǵa bolatynyn izdestirip jatyrmyz, sondyqtan avtobýstardyń naqty baǵyty áli anyqtalmady", - dedi "Almatyelektrkólik" JShS jetekshisi Rızvan Sınaev. Onyń aıtýynsha, Qytaıdy eseptemegende, basqa elderde elektravtobýstaryn jappaı qoldaný tájirıbesi áli engizilmegen.