Hantavırýs adamdar arasynda jappaı taralatyn indet emes. Bul týraly qoǵamdyq densaýlyq saqtaý salasynyń mamandary málimdedi. Olardyń aıtýynsha, dál qazir Qazaqstan turǵyndaryna alańdaýǵa eshqandaı negiz joq, dep jazady Egemen.kz.
Mamandardyń aıtýynsha, bul shtamm adamdar arasynda tek uzaq ári tyǵyz baılanys kezinde ǵana berilýi múmkin. Kóbine mundaı jaǵdaı otbasy ishinde nemese naýqasqa kútim jasaý barysynda kezdesedi.
24KZ málimetinshe, ınfeksııanyń negizgi belgileri – dene qyzýynyń 39-40 gradýsqa deıin kóterilýi, qatty bas aýrýy, deneniń syrqyraýy, bet, moıyn jáne keýde tusynyń qyzarýy. Sonymen qatar ishtiń aýyrýy, bórtpe shyǵýy jáne búırek tusynyń syrqyraýy baıqalýy yqtımal.
Aldyn alý úshin mamandar kemirgishtermen baılanystan saqtanýǵa, olar júrýi múmkin oryndarǵa barmaýǵa jáne jeke gıgıena talaptaryn qatań ustanýǵa keńes beredi.
Jańa pandemııa qaýpi bar ma? Eýropada hantavırýs juqtyrý derekteri kóbeıdi
Qoǵamdyq densaýlyq saqtaý ortalyǵy basqarma tóraǵasynyń keńesshisi Albert Asqarov hantavırýs álemniń kemirgishter kezdesetin barlyq óńirinde taralǵanyn aıtty.
«Jyl saıyn dúnıejúzinde shamamen 100 myńǵa deıin jaǵdaı tirkeledi. Alaıda krýızdik kemede anyqtalǵan «Andes» vırýsy – eń qaýipti shtammdardyń biri. Ol Qazaqstan aýmaǵynda joq. Negizinen Ońtústik Amerıka elderinde taralǵan. Sondyqtan qazirgi tańda elimizge qaýip tóndirmeıdi. Eger vırýs syrttan ákeliný qaýpi týyndasa, bizdiń medısına mekemeleri mundaı jaǵdaıǵa daıyn», dedi A. Asqarov.
Sondaı-aq Ulttyq qoǵamdyq densaýlyq saqtaý ortalyǵy saıahatshylarǵa arnalǵan arnaıy saıt baryn aıtty. Ol jerde álem elderindegi epıdemıologııalyq ahýaldy naqty ýaqyt rejıminde baqylaýǵa, qaýipti aýrýlardyń taralý deńgeıin kórýge jáne sapar aldynda qandaı ekpe alý qajet ekenin bilýge bolady. Budan bólek, epıdemıologııalyq jaǵdaıy qaýipsiz sanalatyn úzdik 10 eldiń tizimi de jarııalanǵan.
Fransııada hantavırýs juqtyrǵan alǵashqy adam anyqtaldy