Týrızm jáne sport vıse-mınıstri Serik Jarasbaev Olımpıada chempıony Mıhaıl Shaıdorovtyń máselesine baılanysty resmı málimdeme jasady, dep habarlaıdy Egemen.kz.
Málimdemede otandyq sporttyń maqtanyshy Mıhaıl Shaıdorovtyń óz esimin el sportynyń tarıhyna altyn áriptermen jazǵan sańlaq ekeni atap ótilgen.
«Biz ony árdaıym qoldaımyz jáne halyqaralyq arenada tabysty óner kórsetip, bıik jetistikterge jete berýine tilektespiz. Qoǵamda keńinen talqylanyp jatqan kelisimshart máselesine toqtalsam, búgingi kúni kelisimshart Shaıdorovtyń komandasyna joldandy jáne oǵan qol qoıyldy. Qol qoıý rásiminiń barlyǵy qoldanystaǵy zańnama talaptaryna sáıkes ótti. Taraptar ortaq mámilege kelip, kelisimsharttyń barlyq tarmaǵyn jan-jaqty talqylady. Qujatqa qol qoıylǵannan keıin mınıstrlik ony jumys tártibimen qabyldady. Aldaǵy ýaqytta kelisimshartta kózdelgen barlyq qarjy tolyq kólemde tólenedi», delingen resmı málimdemede.
Sportty damytý dıreksııasy Mıhaıl Shaıdorov jalaqysyna qatysty túsinik berdi
Serik Jarasbaevtyń aıtýynsha, 5 maýsymda Mıhaıl Shaıdorov jańa maýsymǵa daıyndyq úshin AQSh-qa attanady. Sondaı-aq birer kúnnen soń M. Shaıdorov óz komandasymen birge Týrızm jáne sport mınıstrligine keledi.
«Kezdesý barysynda aldaǵy josparlar men kelesi Olımpıadaǵa daıyndyq máselelerin talqylaımyz. Sonymen qatar elimizde mánerlep syrǵanaýdy damytý baǵytyndaǵy jumystar jóninde de pikir almasamyz», dep túıindedi vıse-mınıstr.
Eske salaıyq, Mıhaıl Shaıdorov jalaqy daýyna qatysty málimdeme jasady.