Jıyn barysynda belgili bolǵandaı, Qazaqstanda joldyń qarama-qarsy jolaǵyna shyǵyp ketkeni úshin júrgizýshi kýáliginen aıyrý jazasy engiziledi.
«Biz zańnamada tyıym salynǵan joldyń qarama-qarsy jolaǵyna shyǵý týraly normany kúsheıteıik dep sheshtik. Bul rette qarama-qarsy jolaqqa shyǵyp burylys jasaý da júrgizýshi kýáliginen aıyrýǵa alyp keledi», - dedi ol.
Onyń aıtýynsha, zańǵa motosıklmen júrip kele jatqanda júrgizýshide, jolaýshyda motoshlemdi kııýin mindetteý týraly talap engiziledi. Buǵan deıin atalǵan norma jol qozǵalysy erejesinde ǵana bolǵan.
Sonymen qatar endi Qazaqstanda júrgizýshi kýáliginiń merzimi ótken jaǵdaıda qaıta emtıhan tapsyrý joıylady.
Jalpy, depýtattar atalǵan zańǵa engizilýi tıisti 120-dan astam túzetýdi qarastyrǵan. Nátıjesinde onyń 55-i qalyp otyr. Zańda jol júrisi erejesin buzǵany úshin ákimshilik aıyppuldardy azaıtý, qujattardy tekserý barysynda kólik júrgizýshige foto jáne beınetúsirilim jasaýǵa ruqsat berý, kúndizgi ýaqytta eldi mekender ishinde júrgen kezde kóliktiń jaqyn jaryǵyn qosý mindetin alyp tastaý, ishki ister organdarynyń qyzmetkerleri toqtatqan jaǵdaıda onyń ruqsatynsyz jolaýshylardyń kólikten shyǵýǵa tyıymdy alyp tastaý, júrgizýshi kýáliginiń jaramdylyq merzimi ótip ketken jaǵdaıda qaıta emtıhan tapsyrý talabyn alyp tastaý kózdelgen.