Dál osy áýe bazasynan seısenbi kúni tańerteń Sırııa avıasııasy Idlıb provınsııasyndaǵy Han-Sheıhýn qalasyna joramal boıynsha hımııalyq qarý qoldana otyryp soqqy jasaǵan bolatyn deıdi basylym. Sonyń saldarynan ondaǵan beıbit turǵyn qaza boldy.
Taǵy bir amerıkan sheneýniginiń aıtýynsha, raketalyq shabýyl kezinde Sırııa áskerı áýe bazasyndaǵy ushý-qoný joly, ushaqtar men tikushaqtar jáne janarmaı quıý stansalary nysanaǵa alynǵan. Ol Sırııadaǵy reseı áskerı obektileri kózdelmegenin aıtty.
SNN-niń habarlaýynsha, AQSh birneshe elge áskerı operasııa týraly habar bergen, biraq olardyń ishinde Reseı bolmaǵan. Time jýrnalynyń Aq úıdegi tilshisi bergen málimetke sáıkes, operasııa aldynda Donald Tramp Vladımır Pýtınge telefon shalmaǵan.
Al Pentagon ókili nysanaǵa alynǵan áskerı bazada reseılikter bolǵanyn, biraq AQSh olarǵa jasalǵaly otyrǵan shabýyl týraly týraly eskertkenin málimdedi.
Áskerı operasııa týraly aqparat jarııa bola salysymen, AQSh Prezıdenti arnaıy málimdeme jasady. «Búgin men barlyq órkenıetti elderdi Sırııadaǵy qandy qyrǵyndy toqtatý jolyn tabýǵa shaqyramyn. Hımııalyq qarýdy taratý jáne qoldanýdyń aldyn alý AQSh ulttyq qaýipsizdigi úshin ómirlik mańyzdy másele. Búginde kúmánsiz fakt bar: Sırııa tyıym salynǵan hımııalyq qarýdy qoldandy, osylaısha Hımııalyq qarý jónindegi konvensııaǵy mindettemelerin buzdy jáne BUU Qaýipsizdik Keńesiniń talaptaryn oryndamady» dedi Donald Tramp.
Munyń aldynda AQSh Prezıdenti Sırııada beıbit turǵyndarǵa hımııalyq qarýdan shabýyl jasalyp jatqanyn syrttan baqylap qana otyra almaıtynyn málimdegen bolatyn.
Daıyndaǵan E.Ábdiraman