Chempıondar lıgasynyń shırek fınalyndaǵy qarsylastar anyqtalǵanda "Barselonaǵa" "Iýventýstyń" ońaı bolmaıtyny belgili edi. Qazirgi týrındikter eki jyl burynǵy komanda emes. Bul "Iýventýs" Fransııanyń "Parı Sen Jermeni" emes. Munda Italııanyń myqty qorǵaýshylary jınalǵan. О́tken jazda komandanyń bas bapkeri Massımılıano Allegrı ózine qajet fýtbolshylardy qataryna qosqan.
Bul oıynda biz birer aı buryn fransııalyqtardy tas talqan etken "Barselonany" emes kerisinshe Parıjde oısyraı utylǵan komandany kórdik. Bul joly biz qarsylasynan aılasyn asyra bilgen Messı, Neımar, Sýares úshtigin burynǵy deńgeıinde kóre almadyq. Ortalyq jartylaı qorǵanysta Serhıo Býsketstiń joqtyǵy (sary qaǵazynyń kóptiginen qatysa almady) men negizgi quramda qorǵaýshy Jeremı Mateniń shyqqanynan-aq ıspanııalyqtardyń jaǵdaıy qıyn ekeni túsinikti edi.
"Iýventýs" "á", degennen-aq qarsylastaryn qysymǵa alýmen bastady. Árbir týrındik ózine jaýapty oıynshyny nazardan tys qaldyrmady. Sol qaptaldan Danıel Alves otandasy Neımardyń adymyn ashtyrmasa, oń qaptaldan Lıonel Messıdi Aleks Sandro ózinen uzata qoımady. Al ortalyq qorǵaýshylardy buzyp ótetin Lýıs Sýares Djordjo Kelını men Leonardo Bonýchchıdiń arasynan kórinbeı de qaldy. Katalondyqtar ádettegideı dopqa kóbirek ıelik etýmen ǵana boldy.
Matchtaǵy alǵashqy gol 7-mınýtta soǵyldy. Oń qaptaldan aıyp alańyna engen Hýan Kýadradonyń pasynan keıin Paýlo Dıbala mergendigimen tanylyp, esep ashty. Kezdesýdiń 22-mınýtynda sol qaptaldan Marıo Mandjýkıchtiń bergen dobyn Paýlo Dıbala toqtatpastan qaqpaǵa birden baǵyttap, dýbl ıesi atandy. Argentınalyq shabýylshynyń bul goly 2014 jyly álem chempıonatynda Brazılııany oısyrata jeńgen Germanııanyń goldaryna uqsaǵandaı.
Alǵashqy taımda 3-4-3 syzbasy sátsiz bolǵandyqtan Lýıs Enrıke kelesi 45 mınýtta burynǵy 4-3-3 nusqasyna kóshti. Ekinshi taımnyń basynda Jeremı Mateniń ornyna Andre Gomeshti shyǵaryp, ortalyq jartylaı qorǵanysta júrgen Maskeranony qorǵanysqa qoıdy. Al Serhı Roberto oń qaptaldyń qorǵanysyna jaýapty boldy.
Birinshi taımdaǵydaı emes kelesi 45 mınýtty qonaqtar jańa qarqynmen bastady. Biraq birinshi bolyp gol jiberip aldy. Oıynnyń 55-mınýtynda Pıanıchtiń buryshtamadan áýelete bergen dobyna Kelını birinshi bolyp jetip, úshinshi dopty soqty. Bul matchtaǵy sońǵy gol boldy. Esep 3:0. Shırek fınaldaǵy alǵashqy oıynda "Iýventýs" Ispanııa chempıonyn osylaısha jeńdi.