Ortsaılaýkom tóraǵasy kezdesýge qatysýshylardy Ortalyq saılaý komıssııasynda jáne eldiń saılaý organdarynda júzege asyrylyp jatqan jumystarmen tanystyrdy. Bul jumystyń negizgi baǵyttary – saılaý zańnamasyn odan ári jetildirý jáne osy jyly ótetin Qazaqstan Respýblıkasy Parlamenti Senaty depýtattarynyń aldaǵy kezekti saılaýyna daıyndyq.
EQYU baǵdarlamasynyń Astana qalasyndaǵy ofısiniń basshysy óz kezeginde tóraǵaǵa kezdesýdi uıymdastyrǵany úshin alǵys aıtyp, odan ári jemisti yntymaqtastyqqa senim bildirdi.
Kezdesýde, sondaı-aq, Ortsaılaýkom músheleriniń 2017 jylǵy mamyrda Varshavadaǵy EQYU/DIAQB shtab-páterine EQYU/DIAQB usynymdaryn oryndaý mártebesine qatysty barýyn uıymdastyrý, qazanda halyqaralyq konferensııa ótkizý jáne qarashada halyqaralyq baıqaýshylarǵa arnalǵan jyl saıynǵy semınar-trenıng uıymdastyrýǵa baılanysty máseleler talqylandy.
Sonymen qatar, kezdesý barysynda Ortalyq saılaý komıssııasy men EQYU-nyń saılaý zańnamalaryn damytý men jetildirý, Qazaqstan Respýblıkasynda saılaý prosesin demokratııalandyrý salasyndaǵy yntymaqtastyq baǵyttaryn odan ári ilgeriletý jaıy talqylandy. Kezdesý sońynda taraptar dástúrli seriktestik pen yntymaqtastyq qarym-qatynastar keleshekte de óziniń jalǵasyn tabatynyna senim bildirdi.