Qos boksshynyń aıqasy AQSh-tyń Konnektıkýt shtatyndaǵy Ankasvıll qalasynda ótti. Olar kýbalyq Salıvan Barrer (18-1, 13 KO) men amerıkalyq Pol Parker (8-1, 4 KO) arasyndaǵy kezdesýdiń anderkartynda kúsh synasty.
Áshkeev-Kemeron aıqasy jetinshi raýndtyń ekinshi mınýtynda toqtatyldy. Otandasymyz gong daýysy estilisimen qarsylasyn qyspaqqa alýmen boldy. Ońtaıy kelgende qarsylasyn joıqyn soqqylarymen qarsy alyp júrdi. Altynshy raýndta Kemerondy tekserý úshin dáriger shaqyrtyldy. Al jetinshi raýndta Madııardyń serııaly soqqylarynan keıin tóreshi jekpe-jekti ýaqytynan buryn toqtatý týraly sheshim qabyldady.
Kezdesý barysynda Madııardyń qabaǵy jaryldy. Biraq bul kezdesýdi ary qaraı jalǵastyrýyna esh kedergi bolmady.
28 jastaǵy otandasymyz sharshy alańdaǵy segizinshi jekpe-jeginde jeńiske jetip otyr. Onyń tórteýinde qarsylasyn nokaýtqa túsirdi. Al 34 jastaǵy Kemeron karerasynda úshinshi ret jeńildi. Enshisinde 10 jeńis (bes nokaýt) bar. Madııar Áshkeevpen judyryqtasyp, kezdesýin alǵash ret merziminen buryn aıaqtady.
Madııar Áshkeev kezekti jeńisinen keıin óz dıvızıonyndaǵy BoxRec reıtınginde birden 56 orynǵa kóterilip, 106-orynǵa turaqtady.
«Birinshi raýndta bastary soǵylyp, Áshkeevtiń qabaǵy jaryldy. Biraq qazaqstandyq boksshy ony shybyn shaqqan qurly kórmedi. Qalǵan raýndtarda joıqyn soqqylary kóbeımese, tolastaǵan joq. Kemeron bilikti, solaqaı boksshy. Árıne, qarsylasynyń qarqynyna taısalyp qalǵan joq. Biraq shamasy jetpedi. Al Áshkeev sol jaq hýkpen amerıkalyqtyń eki búıirine, basyna soqqylaryn dál tıgizdi. Altynshy raýndta Kemeronnyń dárigerge kórinýine týra keldi. Dárigerdiń ruqsatynan keıin jekpe-jek ary qaraı jalǵasty. Biraq uzaqqa sozyla qoımady. Madııar qarsylasyn buryshtan buryshqa qýalap júrip, soqqylaýmen boldy. Nátıjesinde, referı jekpe-jekti jetinshi raýndtyń 1:06 mınýtynda toqtatty», – dep jazdy KO Fantasy Boxing basylymynyń týıtter jelisinde.
Madııar Áshkeev jekpe-jek jaıly vesti.kz basylymyna pikir bildirdi.
«Aıqas jospar boıynsha ótpedi. Alǵashqy raýndta-aq qarsylasym basymen uryp jiberdi. Saldarynan azdap jaraqat alyp qaldym. Osydan keıin tóreshiler kezdesýdi merziminen buryn toqtatpas úshin qarqynymdy arttyrdym.
Úziliste katman qabaǵymnan aqqan qandy toqtatty. Bapkerim Kemeronnyń aıaǵy syr bere bastaǵanyn baıqap, jyldam qozǵalýym kerektigin aıtty. Sondaı-aq, Meıirim Nursultanovtyń da rıngte ne isteý kerektigin aıtqanyn estidim. Qansha degenmen, shet jaqtan bári kórinip turady ǵoı», – dedi Madııar Áshkeev.
Aıta keteıik, osy kúngi boks keshinde taǵy bir qazaqstandyq Meıirim Nursultanov sharshy alańǵa shyqty. Ol meksıkalyq Haver Olveramen kúsh synasyp, ekinshi raýndta tehnıkalyq nokaýtpen jeńiske jetti.
Referı ekinshi raýndta Meıirimniń joıqyn soqqylarynan keıin kezdesýdi toqtatýyna týra keldi. Jerlesimiz kásipqoı boksta eki kezdesý ótkizip, ekeýinde de jeńiske jetip otyr. Alǵash ret ol 2016 jyldyń qarasha aıynda amerıkalyq Genrı Bekfordpen alty raýndtyq kezdesý ótkizip, tóreshilerdiń sheshimimen jeńiske jetken bolatyn.
BoxRec reıtınginde ol 13 orynǵa kóterilip, 436-orynǵa toqtady.