Atalǵan forýmda kýrort isiniń menedjmenti, Qazaqstan shıpajaılaryn akkredıtasııalaý, shıpajaı-kýrorttyq uıymdardy damytý jáne kóbeıtý, kýrort isi mamandarynyń kásibı bilimin arttyrý sııaqty birqatar mańyzdy máseleler talqylandy. Onda elimizdiń túkpir-túkpirinen jáne shetelderden kelgen iri ǵylymı-zertteý ınstıtýttarynyń, medısınalyq ońaltý ortalyqtarynyń, shıpajaı-kýrorttyq mekemeleriniń ókilderi sóz sóıledi. Sondaı-aq, oǵan medısınalyq ońaltý, kardıologııa, ýrologııa, onkologııa, gınekologııa, kýrortologııa, fızıoterapııa, emdik dene shynyqtyrý jáne massaj salasyndaǵy Germanııadan, Chehııadan, Italııadan, Reseıden kelgen jetekshi mamandar qatysty. Sharany Qazaqstan Respýblıkasy Prezıdentiniń Is basqarmasy Medısınalyq ortalyǵy Ulttyq shıpajaılar qaýymdastyǵymen birlese otyryp uıymdastyrdy.
Prezıdenttiń Is basqarmasynyń Medısınalyq ortalyǵy – elimizdegi kýrorttyq salany damytýdy qolǵa alǵan alǵashqylardyń biri ári osy saladaǵy kóptegen isterge bastamashy bolyp kele jatqan mekeme. Osy ortalyqtyń basshysy, «Shıpajaı-2017» halyqaralyq ǵylymı-praktıkalyq forýmyn uıymdastyrý komıtetiniń tóraǵasy Valerıı Benberınniń aıtýynsha, azamattardyń densaýlyǵyn nyǵaıtyp, sozylmaly syrqatpen aýyrǵan jandardyń jany men tánin qalpyn keltirýde kýrorttyq keshenderdiń kómegi kóp. Búginde bul sala saýyqtyrýdyń eń tıimdi ádisi retinde álemdik praktıkada keńinen qoldanylyp keledi. Qazaqstan medısınasy da ońaltý sharalaryna aıryqsha mańyz berip otyr. Osy salany órkendetý isine ózindik úlesin qosyp kele jatqan atalmysh medısınalyq ortalyqta qazirgi tańda 4 myńnan astam maman jumys isteıdi. Medısınalyq ortalyqtyń shıpajaı-kýrorttyq uıymdarynda jyl saıyn 25 myńnan astam adam demalyp, tıisti em-domyn alyp shyǵady eken.
Prezıdenttiń Is basqarmasynyń Medısınalyq ortalyǵy densaýlyqty nyǵaıtýǵa baǵyttalǵan sharalardy odan ári damytyp, jurtshylyqqa joǵary sapaly qyzmet kórsetýdi kózdeıdi. Osy maqsatta byltyrdan beri «Shıpajaı-2017» ǵylymı-praktıkalyq konferensııasyn ótkizýdi qolǵa alǵan. О́tken jyly medısınalyq ortalyqtyń «Almaty» shıpajaıynda ótken alǵashqy jıynda elimizdegi ońaltý uıymdary men shıpajaılyq-kýrorttyq qyzmetti bir ortalyqqa biriktirý jóninde bastama kóterilip, sonyń nátıjesinde Qazaqstannyń Ulttyq kýrorttyq assosıasııasy qurylǵan bolatyn. Endi aldaǵy ýaqytta kýrorttyq isterdi zertteýmen aınalysatyn ǵylymı ınstıtýt ashý josparlanýda.
Málimetke súıensek, búginde Qazaqstan aýmaǵynda 200-den astam shıpajaı men kýrort bar. Al olardyń jumysyn biryńǵaı basqarý júıesine kóshirý, shıpajaılyq keshenderdi damytýdyń memlekettik strategııasyn ázirleý, osy salaǵa ınvestısııa tartý qazirgi medısına salasynyń ózekti máseleleriniń biri bolyp otyr.
Qazaqstannyń Ulttyq shıpajaılar qaýymdastyǵynyń prezıdenti Saıagúl Qaıyrgeldınanyń aıtýynsha, Qazaqstan Respýblıkasynyń shıpajaılar qorynyń ulttyq tizilimin jasaýdy aıaqtap, ony qazaqstandyq shıpajaılar bazasynda saýyǵý múmkinshiligi týraly qoljetimdi aqparattarmen qamtamasyz etý úshin shynaıy jumys tetigine aınaldyrý qajet. Sonymen qatar, shıpajaı nysandarynyń mindetti jiktemesin bekitip, medısınalyq qyzmet deńgeıi men ornalasý jaılylyǵy boıynsha sanattarǵa bólý kerek.
Jıynǵa qatysyp, sóz sóılegender densaýlyqty qorǵaý memlekettik saıasattyń basty baǵyttarynyń biri ekenin, sońǵy jyldary densaýlyqty qalpyna keltirý salasyna elimizde basymdyq berilip otyrǵanyn aıtty. Qazaqtyń ulan-ǵaıyr jeri paıdaly tabıǵı resýrstarǵa baı ekendigin alǵa tartyp, osyndaı en baılyǵymyzdy emdeý-saýyqtyrý isine tıimdi paıdalanyp, bul salany tıisti deńgeıge jetkizýge umtylýymyz kerektigin tilge tıek etti.
Konferensııa qatysýshylary sońǵy jyldary Qazaqstannyń medısınasy qarqyndy damyǵanyn aıtady. Ásirese, elimizde býyn, júrek, baýyr, búırek almastyrý sekildi operasııalar tabysty jasalyp jatyr. Mundaı aýyr otalardy basynan ótkergen azamattardyń kóbeıýine baılanysty ońaltý, qalpyna keltirý sharalaryna jańasha kózqaras pen tyń serpin qajet. Osyndaı máselelerdi alǵa tartqan mamandar ǵylymı praktıkalyq-konferensııanyń qararyn qabyldady.
Basqosý aıasynda sondaı-aq, shıpajaı-kýrorttyq uıymdardyń jáne farmasevtıkalyq ónim óndirýshileriniń kórmesi uıymdastyryldy. «Qazaqstan Respýblıkasyndaǵy kýrortologııa máseleleri» atty ǵylymı-praktıkalyq jáne aqparattyq jýrnaldyń alǵashqy nómiri taratyldy.
Jalpy, ekinshi ret ótkizilip otyrǵan halyqaralyq ǵylymı-praktıkalyq forým bıyl Prezıdenttiń Is basqarmasy Medısınalyq ortalyǵynyń demalys oryndarynyń biri – «Oqjetpes» shıpajaıynyń 50 jyldyǵyna oraı ótkizildi.
Dınara BITIKOVA,
«Egemen Qazaqstan»
Aqmola oblysy