Koreıalyq delegasııany eldiń Memlekettik basqarý jáne ishki ister vıse-mınıstri Song-Rel Kım basqaryp kelse, qazaqstandyq delegasııaǵa Aqparat jáne kommýnıkasııalar mınıstri Dáýren Abaev jetekshilik jasady. Kezdesý barysynda taraptar elektrondy úkimet salasyna qatysty ózara yntymaqtastyqty tereńdetý múmkindikterin qarastyrdy. «Sıfrly Qazaqstan» baǵdarlamasy aıasynda memlekettik-jeke menshik áriptestik modeli boıynsha birlesken jobalardy ázirleýge qatysty kelissózder júrgizý týraly ýaǵdalasty.
Elimizdiń aqparat jáne kommýnıkasııalar mınıstri Dáýren Abaev atap ótkendeı, bul semınar ótken jyldyń qarasha aıynda Býsan qalasynda jasalǵan memorandýmnan keıingi aralyqta ótkizilip otyrǵan alǵashqy shara. Aldaǵy ýaqytta osy tektes basqa da sharalardy uıymdastyrý josparlanǵan.
Kezdesý barysynda Dáýren Abaev:
– Búginde Qazaqstanda elektrondy úkimettiń ınfraqurylymy jasaldy, bazalyq komponenteri iske qosyldy. Sonyń arqasynda memlekettik qyzmettiń 700 túrin elektrondy túrde alýǵa bolady. 2012 jydan bergi aralyqta barlyq lısenzııalar tek elektrondy túrde berilip keledi. Sol sııaqty, mobıldik úkimet arqyly 80 túrli qyzmetti paıdalanýǵa jaǵdaı jasalǵan,– dep atap ótti.
Jıynǵa qatysýshylar «aqyldy qalalar», «praktıkalyq úkimet» syndy jobalardy odan ári damytý jaıyn jan-jaqty talqylady. Koreıa Respýblıkasy Ulttyq arhıvynyń qyzmetkeri Kım Djepaıong qazaqstandyq mamandar úshin arnaıy semınar ótkizdi.
Jalpy, aqparattyq tehnologııalar, elektrondy úkimet salasynda Koreıa álemdegi kóshbasshy elderdiń biregeıi sanalady. Bul oraıda, Qazaqstan 193 eldiń ishinde 33-orynda turǵanyn atap ótken jón. Iаǵnı, bizdiń elimiz úshin korıalyq áriptesteriniń ozyq tájirıbesimen tanysyp, artyqshylyqtaryn meńgerýdiń paıdasy zor.
Bıyl Qazaqstan men Koreıa Respýblıkasy arasynda dıplomatııalyq qarym-qatynastardyń ornaǵanyna bıyl 25 jyl tolyp otyr. Osy ýaqyt aralyǵynda eki el barlyq deńgeıde saıası dıalog ornatyp, ekijaqty saýda-ekonomıkalyq jáne ınvestısııalyq baılanysta úlken nátıjelerge qol jetkizdi deýge tolyq negiz bar. О́tken jyldyń qarasha aıynda Elbasynyń Koreıaǵa jasaǵan memlekettik sapary ekijaqty qarym-qatynastyń odan ári damýyna tyń serpin berip, áriptestik baılanystar nyǵaıa tústi. Sol saparda Býsan qalasynda eki eldiń tıisti mınıstrlikteri arasynda memonardýmǵa qol qoıylǵanyn joǵaryda atap óttik. Astanada ótken kezdesý barysynda Aqparat jáne kommýnıkasııalar mınıstri Dáýren Abaev pen Koreıa Respýblıkasy Memlekettik basqarý jáne ishki ister vıse-mınıstri Song-Rel Kım ózara is-qımyl jónindegi hattamaǵa qol qoıǵanyn joǵaryda atap óttik.
Búgingi tańda elimizde aqparattyq-kommýnıkasııalyq tehnologııalardy damytý júıeli túrde júrgizilip kele jatyr deýge bolady. Elimizdiń barlyq qalalary baılanystyń 4G túrimen qamtylǵan, halyqtyń 73 paıyzy ınternetke qol jetkizgen. Degenmen osy jetistikterge shektelip qalýǵa áste bolmaıtyny túsinikti. Bul týraly Dáýren Abaev:
– Biz qazir elimizde odan ári sıfrlandyrý, memlekettik taraptan beriletin qyzmetti odan ári ońtaılandyrýdy qarastyryp otyrmyz. Osy sharalarda eki-úsh memleket topbasshy bolyp keledi. Sonyń biri – Koreıa. Koreıanyń úlgisin Qazaqstanǵa alyp kelemiz. Sebebi, bul salany odan ári damytýymyz kerek. Halyqqa qyzmet kórsetý ortalyqtarynda adamdar nege kezekte turady? Sebebi, tıisti qujatty elektrondy úkimet arqyly alatyn adamdardyń úlesi sol qujatty HQO-ǵa baryp alatyndar sııaqty kóp emes. Jańa tehnologııalar arqyly biz «elektrondy úkimetti» damydamyz. Iаǵnı, elimizdiń azamattary HQO-ǵa baryp alatyn qujattardy úılerinde otyryp ala beretin bolady. Azamattardyń da, HQO qyzmetkerleriniń de ýaqyty únemdeledi. Biz osy tektes jumystardyń barynsha sapaly bolǵanyn qalaımyz. Búgin qol qoıylǵan hattamanyń aıasynda Koreıanyń tájirıbesin úırený, ınvestısııany qaıda salý kerektigin meńgerý, qandaı jumystardy jaqsartý kerektigin túsiný qarastyrylǵan. Sonyń esebinen qarajat ta aıtarlyqtaı únemdeledi,– dedi.
Koreıa Respýblıkasy Memlekettik basqarý jáne ishki ister vıse-mınıstri Song-Rel Kım de hattamaǵa qol qoıý rásiminen keıin jýrnalısterge suhbat berdi. Onyń aıtýynsha, aldaǵy ýaqytta elektrondy úkimettiń «smart qala», kıberqaýipsizdik, data-ortalyq salý jáne basqa da salalarynda ekijaqty yntymaqtastyq damıdy.
– Búginde Koreıada halyqtyń 80 paıyzy elektrondy úkimettiń qyzmetine júginedi. Bul saladaǵy aqparattyq tehnologııalardy damytý boıynsha úzdik elderdiń sanatyndamyz. Aldaǵy elý jylǵa arnalǵan baǵdarlama ázirlep, «Smart nation» syndy jobany júzege asyrmaqpyz. Qazaqstan da aqparattyq tehnologııalardy damytý boıynsha Ortalyq Azııada kósh bastap kele jatqan memleket. Sondyqtan sizdermen arada ózara tıimdi áriptestik ornatýǵa daıynbyz. Halyqqa qyzmet kórsetý sapasyn jaqsartý úshin qandaı sharalar qolǵa alynýy kerek bolsa, sol baǵytta tájirıbe bólisemiz,– dedi Song-Rel Kım.
Osy kezdesýde belgili bolǵandaı, bıyl qazaqstandyq sarapshylar men birqatar laýazymdy tulǵalar elektrondy úkimet salasyndaǵy bilimin jetildirip, mashyqtaryn arttyrý maqsatynda tıisti baǵdarlamaǵa qatyspaq. Qazaqstandyq tarap koreıalyq áriptesterin elordada ótetin EKSPO-2017 kórmesine qatysýǵa, ózara tájirıbe almasýǵa shaqyrdy.
Arnur Asqar,
"Egemen Qazaqstan"
Sýretterdi túsirgen Erlan OMAROV,
«Egemen Qazaqstan»