Elbasy N.Nazarbaev halyqqa arnaǵan Joldaýynda: «Qazaqstan – jas, kópultty, bolashaǵyna senimdi jáne qarqyndy damyp kele jatqan memleket! Aldymyzda qandaı qıyndyqtar kezdesse de, olardy eńsere alatynymyzǵa senimdimin. Bizdiń basty kúshimiz – birlikte», degen bolatyn. Osy oraıda, ıaǵnı eldiń yntymaq-birligin saqtaýda Qazaqstan halqy Assambleıasyna mol jaýapkershilik júktelip keledi.
Jasyratyny joq, etnomádenı birlestikterdiń jumysy úlken merekeler men aıtýly kúnderde ótkizetin mádenı is-sharalary arqyly kóbirek kórinedi. Degenmen, turǵyndar arasyndaǵy tatýlyqty nyǵaıtýda atqaryp otyrǵan, «jarnamalanbaıtyn» jumystary eren. Qazaqstan halqy Assambleıasynyń jyl saıyn ótetin sessııasynda negizgi baǵyttar aıqyndalady, jergilikti jerlerde is-sharalar jospary belgilenedi. Iаǵnı, qoǵamǵa qajettiligin, el damýyna aýqymdy úles qosa alatynyn dáleldegen, ári dúnıe júzinde balamasy joq ınstıtýt jumysynda sessııanyń alar orny úlken.
– Biz Assambleıa sessııasyn shyn máninde asyǵa kútemiz. Sebebi, ár sessııada naqty tapsyrmalar beriledi, baǵyttar aıqyndalady. Baǵdarlamalar jasalyp, josparlar túziledi. Mysaly, byltyrǵy jyly sessııa «Táýelsizdik. Kelisim. Bolashaǵy birtutas ult» taqyrybynda ótti. Sol basqosýda Qazaqstan Prezıdenti búkil el boıynsha 1993 qoǵamdyq kelisim keńesi jáne 820 analar keńesi qurylǵanyn, olar halyqtyń naqty máselelerin sheshýmen, jergilikti deńgeıde jáne ujymdarda qaqtyǵystardyń aldyn alýmen aınalysatynyn atap ótti. Osy oraıda, óńirimizde arnaıy jıyndar ótkizilip, qazaqstandyq birtektilik pen jalpyulttyq birlikti nyǵaıtý men damytýdyń irgetasy retinde otbasylyq qundylyqtardy nyǵaıtý jumystary talqylandy.
Sonymen qatar, jastar tárbıesi baǵytynda atqarylyp jatqan jumystardy damytýdyń jaıy saralandy. Analar keńesiniń jumysyn aýyl-aımaqtarda jandandyrý máselesi de nazardan tys qalǵan joq. Halyqqa jaqyndasý arqyly ózgerýimiz kerektigi aıtyldy. Kóp is-sharalardy halyqpen birge sheshýimiz kerek. Mine, bul sessııadan keıingi jumystardyń biri ǵana. «Biz dostyqty qazaqstandyqtardyń barlyq býynynyń basty ıgiligi retinde saqtaı bildik. Bizdiń biregeı jolymyz – teń quqyqtylyq, bir shańyraq astynda ómir súretin barlyq etnostyń birligi men kelisimi halyqtyń tilek-qalaýymen tańdaldy. Qazaqstan halqy Assambleıasy – Táýelsizdik jemisi. Assambleıa kez kelgen syn-qater tóngen kezde jáne Táýelsizdiktiń barlyq kezeńinde árdaıym bıikten tabyldy», degen Elbasy N.Nazarbaevtyń sol sessııada aıtqan sózi bárimizdiń jadymyzda. Bul jolǵy ótetin basqosýda tyń bastamalar kóteriletinine kámil senimdimin. Turaqtylyq, birlik, kelisim – elimiz táýelsizdik alǵaly beri Elbasy alyp kele jatqan eń úlken ıdeıa, ıdeologııa jáne ony biz árdaıym qoldaımyz. Osy baǵytta jumys isteımiz. Iаǵnı, aldaǵy ýaqytta da tek qana mádenı is-sharalarmen shektelmeı, búgingideı baǵdarlamalar boıynsha jumysty jalǵastyratyn bolamyz. Qazaqstan halqy Assambleıasy HHV sessııasyna óńirdegi delegasııa quramynda qatysý men úshin úlken qurmet pen senim dep bilemin. Aldaǵy sessııa bizge tyń kúsh, jańa serpin berip, naqty maqsattar men mindetter qoıatyny aıqyn. Jáne úlken jaýapkershilik júkteıdi. Bizge artylǵan senim údesinen shyǵý maqsatynda jumys isteıtin bolamyz, – deıdi «Yntymaq» etnosaralyq mádenı birlestiginiń tóraıymy Gaýhar Tólepova.
Osy arada aıta ketelik, Ońtústik Qazaqstan oblysynda 3 mıllıondaı halyq, onyń ishinde 700 myńǵa jýyǵy ózge ult ókilderi tatý-tátti ómir súrýde. Jalpy sany 20 oblystyq etnomádenı birlestik jumys isteıdi. Olardyń aýdandar men qalalarda 51 fılıaly men 17 jastar qanaty, 11 jeksenbilik mektebi bar. О́ńirde jyl saıyn ár etnomádenı birlestik óziniń tili, mádenıeti jáne dástúri kúnderin atap ótýde. Sonymen qatar, ár salada jetistikke jetken belsendi etnos ókilderi jyl saıyn oblys ákiminiń «Baýyrmal» syılyǵymen marapattalady. Qaıyrymdylyqty úılestirýde «Qamqor», «Júrekten júrekke» aksııalary uıymdastyrylyp keledi. Sondaı-aq, óńir tarıhynda alǵash ret etnomádenı birlestikter arasynda «Dostyq syıy» aksııasy bastaý alyp, «Meniń elim – Qazaqstan!», «Táýelsizdik tuǵyry – Máńgilik El!», «Qazaq dastarqany», «Igraı, garmon!», «Dostyq tilegi» syndy biregeı is-sharalar ótkizilýde.
Sondaı-aq, sessııa delegattary elimizdegi birlik pen qoǵamdyq kelisimniń bastaýy – Qazaqstan halqynyń ortaq tarıhy ekenin, ǵasyrlar boıy taǵdyr talaıyna ushyraǵan halyqtardy qushaǵyna syıdyra bilgen qasıetti Uly Dala kóptegen ulys pen ulttyń qutty qonysyna aınalǵanyn aıtýda. «Baq ta, taq ta talasqanǵa buıyrmaıdy, halyqtyq iste jarasqanǵa buıyrady», degen dana babalarymyz. Iаǵnı, elimizdegi ult pen ulystar birlese atqaratyn ıgilikti ister halqymyzdyń birligi men yntymaǵyn berik ete túsetini aıqyn.
Ǵalymjan Elshibaı,
«Egemen Qazaqstan»
Ońtústik Qazaqstan oblysy