Eski úıler máselesin sheshý, apatty úılerde turatyn azamattardyń turǵyn úı jaǵdaılaryn jaqsartý maqsatynda Astanada apatty úılerdi buzý boıynsha joba iske asyrylýda, dep habarlandy qala ákimdiginiń resmı saıtynda.
Joba sharttaryna sáıkes, qala ákimdigi apatty úılerdiń turǵyndaryn aýdandary boıynsha birdeı jańa páterlerge kóshirýdi júrgizýde.
Elordalyq Turǵyn úı basqarmasynyń málimetterine sáıkes, qurylys konstrýksııalary men ınjenerlik júıeleriniń tozý deńgeıi joǵary, 1940-1980 jyldar aralyǵynda salynǵan úıler buzýǵa jatady.
2017 jyldyń sońyna deıin 228 apatty qurylysty buzý josparlanǵan, sonyń ishinde «Saryarqa» aýdany boıynsha - 129 úı, «Almaty» aýdanynda - 78, «Esil» aýdanynda - 21 úı. Kóshiriletin azamattardyń jalpy sany 3500-den asa otbasyny quraıdy.