Zań jobasymen elimizdiń Bıýdjet kodeksine, «Salyq jáne bıýdjetke tólenetin basqa da mindetti tólemder týraly» kodekske (Salyq kodeksi) jáne «Dene shynyqtyrý jáne sport týraly» zańǵa ózgerister men tolyqtyrýlar engiziledi. Atap aıtqanda, Ulttyq olımpıada komıtetine 2018 jylǵy 1 qańtardan bastap dene shynyqtyrý jáne sport salasyndaǵy memlekettik tapsyrmany alýǵa jáne oǵan qatysýǵa quqyq berýdi kózdeıdi. Sondaı-aq sport túrlerin saralaý júıesin engizý usynyldy. Ýákiletti organ men jergilikti atqarýshy organdarǵa qosymsha mindetter beriledi.
Zań jobasyndaǵy birqatar erejeler boıynsha qyzý pikirsaıys óristedi. Senatorlar Jabal Erǵalıev pen Álı Bektaev sheteldik legıonerlerdi tartýǵa ketetin eleýli qarjynyń shyǵysyna alańdaýshylyq bildirdi. Depýtattardyń aıtýynsha, aımaqtardaǵy sportty qarjylandyrýǵa bólinetin qarjynyń 40-50 paıyzy kásibı fýtbol toptaryna beriledi. Degenmen, dene shynyqtyrý jáne sport salasyndaǵy fýtbol men sporttyń keıbir basqa túrleriniń nátıjesi tómen deńgeıde qalyp otyr.
Bizdiń elimizdegi legıonerlerge bólinetin qarjynyń jalpy somasy týraly depýtat Vladımır Redkokashınniń qoıǵan saýalyna dene shynyqtyrý jáne sport mınıstriniń orynbasary Sáken Musaıbekov naqty jaýap aıta almady. Mınıstrdiń orynbasary kásibı fýtbol klýbtary bıýdjetiniń jabyqtyǵyn aıta otyryp, klýbtardyń memleket qarjysy esebinen qarjylandyrylatynyn jetkizdi. Mınıstrlik ókili sporttyń jekelegen túrleri túrleri boıynsha legıonerlerdi tartý ózin ózi aqtaǵanyn aıtty.
Senatorlar Jabal Erǵalıev, Álı Bektaev jáne Serik Bekturǵanov ulttyq sport túrlerin qoldaýǵa shaqyryp, daryndy balalarǵa arnalǵan oblystardaǵy sporttyq mektep-ınternattarǵa qalǵan qarjyny berý daǵdysyna nazar aýdardy.
Pikirsaıysty qorytyndylaı kelip, Áleýmettik-mádenı damý jáne ǵylym komıtetiniń tóraǵasy Birǵanym Áıtimova qabyldanǵan erejeler osy salanyń aıqyndyǵyn qamatamasyz etetinine, olımpııalyq jáne paraolımpııalyq qozǵalystardy, ulttyq sport túrlerin damytýǵa qyzmet etetinin úmit artatynyn jetkizdi.
Zań jobasy Palatanyń qaraýyna jiberildi.