2010 jylǵy 28 shilde №399 Astana qalasy
«Bastaýysh, negizgi orta jáne jalpy orta bilimniń jalpy bilim beretin oqý baǵdarlamalaryn iske asyratyn bilim berý uıymdaryna qabyldaýdyń úlgi erejesin bekitý týraly» Qazaqstan Respýblıkasy Bilim jáne ǵylym mınıstri mindetin atqarýshynyń 2007 jylǵy 25 jeltoqsandaǵy № 651 buıryǵyna tolyqtyrýlar engizý týraly
«Bilim týraly» Qazaqstan Respýblıkasynyń Zańyn iske asyrý maqsatynda buıyramyn:
1. «Bastaýysh, negizgi orta jáne jalpy orta bilimniń jalpy bilim beretin oqý baǵdarlamalaryn iske asyratyn bilim berý uıymdaryna qabyldaýdyń úlgi erejesin bekitý týraly» Qazaqstan Respýblıkasy Bilim jáne ǵylym mınıstri mindetin atqarýshynyń 2007 jylǵy 25 jeltoqsandaǵy № 651 buıryǵyna (normatıvtik quqyqtyq aktilerdiń memlekettik tirkeý tiziliminde № 5111 tirkelgen, «Zań gazetiniń» 2008 jylǵy 28 tamyzdaǵy № 131 (1531) sanynda jarııalanǵan) mynadaı tolyqtyrýlar engizilsin:
kórsetilgen buıryqpen bekitilgen Bastaýysh, negizgi orta jáne jalpy orta bilimniń jalpy bilim beretin oqý baǵdarlamalaryn iske asyratyn bilim berý uıymdaryna qabyldaýdyń úlgi erejesi mynadaı mazmundaǵy 5-taraýmen tolyqtyrylsyn:
«5. Daryndy balalarǵa arnalǵan mamandandyrylǵan bilim berý uıymdaryna (qazaq-túrik lıseılerine) qabyldaý erekshelikteri
17. Daryndy balalarǵa arnalǵan mamandandyrylǵan bilim berý uıymdaryna (qazaq-túrik lıseılerine) (budan ári - QTL) altynshy synypty bitirgen balalardy qabyldaý konkýrstyq negizde túsý emtıhandarynyń nátıjesi boıynsha júzege asyrylady. QTL basshylary oqýǵa túsýshilerdi, olardyń ata-analaryn nemese ózge de zańdy ókilderin qabyldaý erejelerimen, jarǵymen jáne QTL-de bilim berý prosesiniń uıymdastyrylýyn retteıtin basqa da qujattarmen tanystyrýy qajet.
18. Oqýshylardy qabyldaýdy uıymdastyrý jáne túsý emtıhandaryn ótkizý maqsatynda Qazaqstan Respýblıkasy Bilim jáne ǵylym mınıstrligimen 2003 jylǵy 17 naýryzda Astana qalasynda jasalǵan «Qazaqstan Respýblıkasyndaǵy qazaq-túrik oqý oryndarynyń bilim berý salasyndaǵy yntymaqtastyǵy týraly kelisim» sheńberinde áreket etetin «KATEV» Halyqaralyq Qoǵamdyq Qory qurǵan ortalyq qabyldaý komıssııasy jasaqtalady.
19. Jergilikti jerlerde túsý emtıhandaryn ótkizý jáne emtıhan paraqtaryn ortalyq qabyldaý komıssııasyna jiberý úshin QTL basshylary úsh pedagogten turatyn jergilikti qabyldaý komıssııasyn qurady.
20. QTL-ge túsý emtıhandary eki kezeńnen turady:
birinshi kezeń – testileý nysanynda ótkiziledi jáne jetinshi synypqa deıingi matematıka kýrsy boıynsha baǵdarlamalyq materıaldardan jáne logıka boıynsha suraqtardan turady. Suraqtardyń jalpy sany - 60. Testileý oqýshynyń tańdaýy boıynsha qazaq nemese orys tilderinde ótkiziledi. Testileýge 1 saǵat 40 mınýt beriledi.
ekinshi kezeń – psıhologııalyq–taldamalyq test. Túsý emtıhandarynyń ekinshi kezeńinde oqýshylar QTL ınternattarynda 5-8 kún turady jáne olardyń ujymdyq ortaǵa beıimdelýin tekseretin jáne oqý materıalyn qabyldaý deńgeıin anyqtaıtyn matematıka, qazaq, túrik jáne aǵylshyn tilderi boıynsha kýrstarǵa qatysady.
21. Jergilikti komıssııa birinshi kezeńniń qorytyndylary boıynsha testileý nátıjelerin konkýrs (reıtıng) boıynsha eń joǵarǵy ball jınaǵan ekinshi kezeńge ótetin oqýshylardyń sanyn anyqtaıtyn ortalyq qabyldaý komıssııasyna jiberedi.
Bir synypty (25 adam) jınaý kezinde ekinshi kezeńge 40-tan aspaıtyn oqýshy shaqyrylady, al eki (50 adam) nemese úsh (75 adam) synyp jınaý kezinde ekinshi kezeńge tıisinshe 80-nen nemese 120-dan aspaıtyn oqýshy shaqyrylady.
Ekinshi kezeńniń qorytyndylary boıynsha jergilikti komıssııa ár synyp úshin hattama jazyp, olardy qabyldaý týraly sheshim shyǵarý úshin ortalyq qabyldaý komıssııasyna jiberedi.
22. Árbir kezeńniń nátıjesi olar ótkizilgennen keıin on bes kúntizbelik kún ótken soń jarııalanady. Qabyldanǵan sheshimmen kelispegen jaǵdaıda oqýshy apellıasııaǵa bere alady. Apellıasııa nátıjeler jarııalanǵannan keıin tórt kúntizbelik kún ishinde beriledi jáne apellıasııalyq komıssııamen qaralady.
23. Túsý emtıhandarynyń qorytyndylary boıynsha ortalyq qabyldaý komıssııasy lıseıge eń joǵary ball jınaǵan jáne QTL basshylarynyń buıryqtarymen bekitilgen QTL-ge qabyldaý quqyǵyna ıe bolǵan oqýshylar tizimin joldaıdy.».
2. Mektepke deıingi jáne jalpy orta bilim departamenti (N. Arshabekov):
1) osy buıryqtyń belgilengen tártippen Qazaqstan Respýblıkasy Ádilet mınıstrliginde memlekettik tirkelýin qamtamasyz etsin;
2) memlekettik tirkeýden ótkennen keıin osy buıryqty buqaralyq aqparat quraldarynda jarııalasyn.
3. Osy buıryqtyń oryndalýyn baqylaýdy ózime qaldyramyn.
4. Osy buıryq resmı jarııalanǵannan keıin on kúntizbelik kún ótken soń qoldanysqa engiziledi.
Mınıstrdiń mindetin atqarýshy M. SARYBEKOV.
Buıryq Qazaqstan Respýblıkasynyń Ádilet mınıstrliginde 2010 jylǵy 23 tamyzda Normatıvtik quqyqtyq kesimderdi memlekettik tirkeýdiń tizilimine № 6425 bolyp engizildi.