Agrarlyq ǵylym men óndirisin damytýda artyna óshpesteı iz qaldyrǵan QR Ulttyq ǵylym akademııasynyń akademıgi, Sosıalıstik Eńbek Eri, aýyl sharýashylyǵy ǵylymynyń doktory, professor Qasym Asanovtyń týǵanyna 70 jyl tolýyna oraı ózi uzaq jyldar qyzmet istegen qarashańyraq – Qazaq ulttyq agrarlyq ýnıversıtetinde halyqaralyq ǵylymı-praktıkalyq konferensııa ótti.
15 jyldan asa ýaqyt ǵylym men óndiris birlestiginde azyq pen jaıylym barysynda kóptegen ǵylymı-zertteý jumystaryn júrgizip, onyń tıimdiligi men sapasyn arttyrýǵa ózindik úlesin qosqan ǵalym ómiriniń sońyna deıin ózi jetekshilik etken respýblıkadaǵy «Jem jáne jaıylym» ǵylymı-tehnıkalyq baǵdarlamasy búginde oń nátıjesin berip keledi. Atap aıtqanda, Shyǵys Qazaqstan óńirinde mádenı jaıylymdardy tıimdi paıdalanýdyń, Kaspıı aımaqtaryndaǵy jaıylymdardyń qunarlylyǵyn arttyrýdyń, Volga men Oral, Atyraý aýmaqtaryndaǵy jem óndirisiniń ǵylymı-zertteý jumystarynyń negizin qalady.
Qazirgi tańda osy baǵyttaǵy jumystardyń aýyl sharýashylyǵy salasy úshin bereri kóp ekendigine mamandardyń kózi jetti. Sondyqtan da ǵylym jolynda asqan tabandylyq kórsetken Qasym Asanovtyń qol jetkizgen jetistikteri ómirsheńdigimen qundy. Ol jóninde konferensııada jan-jaqty aıtylyp, ǵalymnyń ǵylymı eńbekteri zerthanada praktıkalyq jaǵynan da kórsetildi. Jıynda sóılegen qonaqtar, belgili ǵalymdar Q.Asanovtyń ashqan jańalyqtarynyń halyqaralyq mańyzyn aıta kele, ol kisiniń azamattyq kelbetine, adamı qasıetterine de toqtaldy.
Gúlzeınep SÁDIRQYZY.