О́mir kórsetip otyrǵandaı, ishki saıası reformany oıdaǵydaı júrgizý arqyly kóp ultty elimizdiń ózara dostyq, yntymaqtastyǵy, birligi, tynyshtyǵy qamtamasyz etilip, ózgelerge úlgi bolarlyq dárejege jetip otyrsa, Elbasynyń sarabdal syrtqy saıasaty arqasynda buryn Keńes Odaǵynyń qatardaǵy respýblıkalarynyń biri bolǵan Qazaqstan qolda bar atom qarýyn kelmeske jiberip, beıbit ómir jarshysy atanyp otyr. Qazaqstan Respýblıkasynyń BUU Qaýipsizdik Keńesiniń turaqty emes múshesi bolyp saılanýy da bizdiń memleketimizge degen úlken senim deı alamyz. Qazaqstan Prezıdenti álem elderi arasynda qaısybir kelispeýshilik-qaqtyǵys kezderinde ara aǵaıyndyq ról atqaryp, úlken bedel men senimge ıe bolyp keledi.
Maqalada sóz bolǵan qaıta túrleýdiń ekinshi prosesi – ekonomıkalyq jańǵyrý. Táýelsizdiktiń alǵashqy jyldary el basyna túsken qıyndyqtar birden eske oralady. Nursultan Ábishuly sol kezden bastap «ótkinshi kezeń» qıyndyqtaryna shydamdylyq kerektigin, burynǵy keńes kezindegideı «ortaq menshik bolmaıtynyn, azamattardyń naryqtyq qoǵamda ómir súrý joldaryn úırenip, bıznespen aınalysýlary, elimizdiń tezirek eńse kóterip ketýi úshin kóptep ınvestısııa tartý qajettigin basa aıtýda. Osy baǵytpen shırek ǵasyrdy artta qaldyrǵan halqymyz qazirgi tańda álemniń eń damyǵan 30 eldiń qataryna qosylý jónindegi baǵdarlamany oryndaýda qajyrly eńbek etip keledi. Bul áleýmettik jańǵyrýdyń arqasynda ótken kezben salystyrǵanda, halyqtyń ál-aýqaty aıtarlyqtaı jaqsara tústi degen sóz.
Elbasy halyqqa arnaǵan ústimizdegi jylǵy Joldaýynda Qazaqstannyń kezegi kelgen úshinshi jańǵyrýy bastalǵanyn aıtqan edi. «Bul saıası jáne ekonomıkalyq jańǵyrýlardy tolyqtyryp qana qoımaı, olardyń ózegine aınalady», dep atap kórsetilgen Joldaýda Birtutas ult bolý úshin buqaralyq sanany qalaı ózgertýge bolatyny jaıly kózqarastar ortaǵa salyndy.
Rýhanı jańǵyrýǵa qatysty maqalada aıtylǵandaı, árbir jańǵyrǵan qoǵamnyń tereńnen bastaý alatyn rýhanı ulttyq kodyn saqtaı bilý basty mindet, eger jańǵyrý eldiń tarıhı ulttyq tamyrynan nár ala almasa, ol adasýǵa aparatyny anyq. Maqalada ult tabysynyń kilti sol eldiń tabıǵı baılyǵynda emes, adamdarynyń básekelik qabiletine baılanysty ekendigi taıǵa tańba basqandaı etip aıtylǵan. Al básekege qabiletti adamdardyń qoǵamnyń san alýan salalarynda kezdesetini talas týǵyzbasa kerek. Materıaldyq saladaǵy básekege laıyqtylar elge úlken tabystar ákelse, ádebıet, mádenıet, óner salasyndaǵylar halyqtyń maqtanyshyna aınalýda. Demek, básekege laıyq joǵary qabiletti, kompıýterdi jetik meńgergen, ǵylymnyń ár salalarynan tereń bilimdi, úsh, odan da kóp tilderdi meńgergen jastar erteńgi memleket, el basshylary, asa daryndy ádebıet maıtalmandary, mádenıet pen óner qyzmetkerleri elimizdiń altyn qazynasy dep bilemin.
«Bolashaqqa baǵdar: rýhanı jańǵyrý» maqalasy syndy salmaqty maqalalar men aýqymdy jobalardy basshylyqqa alǵan táýelsiz Qazaqstanymyz álemniń órkenıetti elderiniń ortasynan oıyp oryn alyp, Uly Dalada erkin ósken «Máńgilik Elimiz» órken jaıa túsedi dep senemiz.
Dúısembi ÁRIPOV
Mańǵystaý oblysy