Oblys ortalyǵynda bolyp ótken bul kórme «MinTech», «KazInterPower» dep atalatyn taý-ken, metallýrgııalyq jáne kómir óndirisi tehnologııasynyń qural-jabdyqtarynyń, sonymen qatar energetıka men elektr júıeleri tehnıkalarynyń kórsetilimderine arnaldy.
Indýstrııalyq-ınnovasııalyq baǵdarlama arqyly óńirde bul kúnderi jalpy quny 3 trıllıon 155 mlrd.teńge turatyn 142 joba júzege asyrylýda. Bul baǵdarlamanyń maqsaty – óndiristi óńirde taǵy da jańa óndiris oryndaryn salýmen ǵana shektelmeı, qural-jabdyqtary tozyp, eskire bastaǵan burynnan kele jatqan iri kásiporyndardy, elektr stansalaryn zamanǵa saı qural-jabdyqtarmen qamtamasyz etip, modernızasııalaý, ıaǵnı, jańartý, jańǵyrtý jumystaryn júrgizý bolyp otyr. Sondyqtan óndiristi óńir úshin bul kórmeniń mańyzy zor. Kórmede Avstrııa, Avstralııa, Belarýs, Germanııa, Slovakııa, AQSh, Ýkraına, Fınlıandııa, Reseı, Shvesııa men Shveısarııa elderinen kelgen kásiporyndar shyǵarǵan qural-jabdyqtar kórsetildi. Solardyń biri tehnologııalyq jeli arqyly túrli analıtıkalyq zertteýler jasaı alatyn qol shamadandaǵy shaǵyn zerthana jer asty shahtalarynda, jazyq dalada, taýly jerlerdegi ekspedısııa jumystarynda ózińizben birge alyp júrýge asa qolaıly eken.
–Jalpy, biz óz qalamyzdyń ken óndirý, metallýrgııa, energetıka sııaqty mańyzdy salalar boıynsha mamandanǵan halyqaralyq kórme ótetin qalalardyń birine aınalǵanyna qýanyshtymyz. Kómir, ferroqorytpa, elektroenergııa men munaı, glınozem men alıýmınııdiń kóp mólsherli paıyzdary osy bizdiń óńirde óndiriledi, – dep atap kórsetken oblys ákimi Baqytjan Saǵyntaev. Mundaı kórmelerdiń oblys ekonomıkasyn damytýdaǵy mańyzyna toqtaldy.
Kórme sórelerinde mashına jasaý, kómir óndirý salasynyń jáne shıkizatty óndirý tehnologııalarynyń birqatar qural-jabdyqtary oryn alǵan. Sondaı-aq, kórmede energetıkalyq mashına jasaý, jylý jáne gazben jabdyqtaý júıeleri, tehnologııalyq prosesterdi basqarýdyń avtomattandyrylǵan júıeleri bar.
Kórmeniń alǵashqy kúninde elimizde shyǵarylǵan «Volvo FMX» atty júk tıeýshi jol tańdamaıtyn, uzaq joldarǵa shydamdy, máshınesi kórsetilip, tusaýkeser rásimi jasaldy. Halyqaralyq kórme eki kúnge sozyldy. Áriptester óndiristi órkendetýdiń jańa tehnologııalyq jetistikterine saı birge jumys jasaýǵa arnalǵan semınarǵa qatysyp, oı-pikirlerin bildirdi. Budan soń, kórmege qatysýshylar Ekibastuzdyń «Bogatyr» kómir razrezi men GRES-2 stansasyn aralap kórdi.
Farıda BYQAI.
Pavlodar oblysy.