Qyzylordadaǵy Dostyq úıinde oblys ákimi Nurlybek Nálibaevtyń qatysýymen «Halyqtyq Konstıtýsııa – qýatty memleket» taqyrybynda sarapshylar kezdesýi ótti. Oǵan máslıhat depýtattary, quqyq qorǵaý organdarynyń, basqarmalar men aýmaqtyq departamentter basshylary, bıznes qaýymdastyǵynyń ókilderi, saıası partııa jetekshileri, úkimettik emes uıymdar, Assambleıa músheleri men jastar qatysty.
Aımaq basshysy konstıtýsııalyq reformanyń mańyzdylyǵyna toqtalyp, jalpyhalyqtyq referendýmnyń el bolashaǵy úshin aıryqsha mánge ıe ekenin atap ótti.
«Konstıtýsııalyq reforma jónindegi jalpyhalyqtyq talqylaýlar jarty jylǵa jýyq ýaqyt ártúrli alańdarda ótti. Bul – qoǵamnyń saıası belsendiligi men azamattyq jaýapkershiliginiń aıqyn kórinisi. El taǵdyryna qatysty mańyzdy sheshimderdi halyqtyń tikeleı daýys berýine usyný – demokratııanyń shynaıy ári myzǵymas qaǵıdaty. Jańa Konstıtýsııa jobasynda memleketimizdiń irgeli negizderi, basty qundylyqtary men dúnıetanymdyq ustanymdary júıelenip, zamanaýı talaptarǵa saı jańǵyrtyldy. Jalpyhalyqtyq referendým Táýelsiz Qazaqstannyń aldaǵy damý kezeńin aıqyndap, el tarıhynda jańa belestiń bastalýyna negiz bolady dep senemiz. Prezıdentimizdiń bastamasymen elimizde keıingi jyldary qolǵa alynǵan saıası reformalardy júzege asyrýda Syr óńiri bereke-birliktiń, tatý tirliktiń úlgisin kórsetip keledi. Ultymyzdyń tarıhyna altyn árippen jazylatyn aldaǵy mańyzdy saıası kezeńde Syr jurtshylyǵy elimizdiń shynaıy patrıoty retinde azamattyq ustanymdaryn bildirip, jańa Konstıtýsııanyń jobasyn qoldaıdy dep senemiz. Barshańyzdy osy iske joǵary jaýapkershilikpen belsendi atsalysýǵa shaqyramyn», dedi oblys ákimi.
Jıynda Konstıtýsııalyq reformanyń quqyqtyq negizderi, «Zań men tártip» qaǵıdatynyń ústemdigi baǵytynda oblys prokýrory Rızabek Ojarov baıandama jasady. Qazaqstannyń eńbek sińirgen qaıratkeri, saıası ǵylymdar doktory, professor, Qazaqstan Respýblıkasy Senatorlar keńesiniń múshesi Murat Baqtııaruly Konstıtýsııanyń jańa jobasy jaıly pikir bildirip, keıbir máselelerge toqtala ketti.
«El ishinde júrgesin «Nege Konstıtýsııany ózgerte beredi?» degen saýaldy qulaǵymyz shalyp qalyp jatyr. Zaman ózgerip, qoǵamnyń suranysy jańa satyǵa kóterilgen saıyn osyndaı ózgeristerdiń bolyp turatyny – zańdylyq. Mysaly, Fransııa memleketi qazirgi Konstıtýsııasyn 1958 jyly qabyldaǵan. Osy jyldar ishinde oǵan 24 márte ózgeris engizilipti. Reseıde, Orta Azııadaǵy burynǵy odaq quramyndaǵy memleketter de osy joldan ótti», deıdi ol.
Qaıratker sóz túıininde jańa Konstıtýsııa jobasynyń mańyzdy baǵyttarynyń biri memlekettiń áleýmettik jaýapkershiligin kúsheıtý ekenin eske saldy.
Kezdesýde Qorqyt ata atyndaǵy Qorqyt ata ýnıversıtetiniń basqarma tóraǵasy-rektory Naýryzbaı Baıqadamov «Ádiletti jáne progressıvti Qazaqstannyń halyqtyq konstıtýsııasy úshin» jalpyulttyq koalısııasynyń úgit-nasıhat jumystary jaıly aıtty. Eńbek ujymdarymen, turǵyndarmen kezdesýlerde Konstıtýsııa jobasy jaıly ár sala mamandary túsindirme jasaıdy.
Jıynda bilim salasynyń ardageri Raıkúl Baınazarova Ata zań jobasyndaǵy ǵylym, ınnovasııa, mádenıet, oblystaǵy ÚEU Alıansy tóraǵasy Anar Izden azamattar bostandyǵy men quqyǵy, al «Anaǵa taǵzym» ortalyǵynyń dırektory Altynaı Moljanova otbasy jáne neke qundylyǵy jóninde paıymdy pikir bildirdi.
Qyzylorda