Jasandy ıntellektini orta bilim salasynda engizýdiń ulttyq modeli retinde iske qosylǵan «TopIQ: Smart Class 2.0» kúlli bir synyptyń úlgerimin 32%-ǵa deıin kóterdi. Astananyń №99 orta mektebine bıylǵy sáýirde ornatylǵan sıfrlyq partalarǵa endi basqa da synyp oqýshylary qyzyǵa bastady, dep habarlaıdy Egemen.kz.
Bolashaqtyń ıntellektýaldyq synyby – Smart Class jobasyn TopIQ IT kompanııasy men «Almatykitap baspasy» birlesip júzege asyrdy. 2026 jylǵy sáýirde Qazaqstanda tuńǵysh ret – Astana qalasynyń Bilim basqarmasy jáne ákimdigi iriktegen № 99 orta mektebinde ustazdyń jumys paneli men oqýshynyń jeke partasyn bir júıege toǵystyratyn teńdesi joq sıfrlyq synyptyń jemisi birneshe máseleni birden sheshetinin kórsetti. Atap aıtsaq, Smart Class Memleket basshysy Qasym-Jomart Kemelulynyń 2026-2029 jyldarǵa arnalǵan orta bilim salasyna JI-di keńinen engizý týraly tapsyrmasyndaǵy balaǵa jeke bilim alý mehanızmin qurý, jeke bas dereginiń qaýipsizdigin qamtamasyz etý jáne bala densaýlyǵyna zııan keltirmeý sııaqty «Keshendi jospardaǵy» mańyzdy talaptardy qamtıdy. «TopIQ: Smart Class 2.0» jobasynyń ıdeıa avtory ári jetekshisi – «Almatykitap baspasy» Dırektorlar Keńesiniń Tóraıymy Eleonora Batalova.
«TopIQ: Smart Class 2.0» – Qazaqstanda memlekettik bilim alý prosesine tolyqqandy ıntegrasııalanǵan teńdesi joq sıfrlyq orta. Jasandy ıntellektini orta bilim salasyna etene engizetin ınnovasııalyq bul synyp dúnıe júzinde Sıngapýr, Qytaı, Ońtústik Koreıa sııaqty ozyq tehnologııany orta bilim júıesine áldeqashan qoldanǵan elderdiń mektepterinde jumys istep tur. Birinshi kezekte oqý-aǵartý salasyndaǵy ınklıýzııa máselesin sheshetin Smart Class barlyq balanyń memleketten bilim alýyna teńdeı jaǵdaı jasaıdy, ıaǵnı sabaq barysynda ıntellektýaldy transformerdi erekshe kóńil bólýge muqtaj bala da, basqa bala da birdeı qoldana alady», deıdi «Almatykitap baspasynyń prezıdenti Gaýhar Saımasaeva.
Bir qaraǵanda otyryp sabaq oqýǵa arnalǵan ádettegi partany aınaldyryp jiberse, aldyńyzda TopIQ oqý platformasy men Qamqor atty JI kómekshi birikken ınteraktıvti sıfrlyq bilim berýshi transformer shyǵa keledi. Ozyq júıede ustazdyń óz smartpaneli jáne smart taqtasy bar. Oqýshynyń jeke smart partasy ózine saı ıkemdeledi: balanyń oqý jáne jazý qarqynyn, sabaqqa qyzyǵý deńgeıi men sharshaý belgilerin saraptaıdy. Úı tapsyrmasyn oryndaý nemese qashyqtan oqý prosesi de TopIQ platformasynyń enshisinde, ıaǵnı Smart Class elimizdiń alys-jaqyn aımaǵyndaǵy mektepter men shaǵyn jınaqtalǵan bilim oshaqtarynyń da suranysyn qamtıdy. Endi Astana qalasynyń №99 orta mektebiniń synaqtan ótip jatqan 3-synybyna basqa oqýshylar qyzyǵyp júrgenin ustazdar jasyrǵan joq.
«Mektebimizge Smart Class ornatylǵaly synaqqa qatysqan 3-synyptyń 25 oqýshysynyń sabaqqa degen yntasy artty. Jalpy synyptyń úlgerimi ortasha eseppen alǵanda 32%-ǵa deıin jaqsardy. Bárinen de oqýshylarymnyń ishinde erekshe kóńil bólýdi qajet etetin eki bala bar, sonyń bireýi qashyqtan oqýdan bas tartyp, Smart Class ashylǵaly mektepke kelip oqydy, kúnde sabaqtan qalmady. Buǵan tańǵalǵan balanyń anasy, meniń balama ne istep qoıdyńdar dep qýanǵannan kúlgen edi. Biz ár oqýshynyń qalaı ózgeretinine muqııat mán beremiz: mysaly erekshe oqýshymnyń bireýi buryn sýret salǵanda kúńgirt tústerdi ǵana qoldanatyn. Qazir balanyń sýreti ómirdiń ashyq jarqyn tústerimen almasty. Jasyratyny joq, sıfrlyq bilim berý júıesiniń balaǵa osynsha áser etetinine týǵan balańa qýanǵandaı bolasyń», deıdi №99 orta mekteptiń bastaýysh synyp muǵalimi Janat Naımanǵazınova.
Dástúrli hám sıfrlyq formatta bilim alýdy biriktiretin Smart Class kórsetken nátıjeni túıindeý úshin, TopIQ IT kompanııasy men «Almatykitap baspasy» oqý jylynyń aıaqtalýyn kútti. Halyqaralyq bala quqyǵyn qorǵaý kúnimen tuspa-tus kelgen qorytyndy bilim salasyndaǵy ózekti máseleler – barlyq balaǵa bilim alýǵa teńdeı jaǵdaı jasaý, erekshe balalardyń qoǵammen etene aralasýy jáne oqýshylardyń jasandy ıntellektini qoldaný barysynda jeke deregin qorǵaý, omyrtqasy qısaıyp ketpeýin, júıke júıesi men kózine zııan kelmeýin qadaǵalaý máseleleri sheshiletinin kórsetti.
Jazǵy demalysta balalarǵa arnalǵan 11 myńnan asa ortalyq jumys isteıdi
Eki aıdaǵy synaqtyń jaǵymdy jańalyǵyn ata-anaǵa, jalpy qoǵamǵa bólisý maqsatynda smart synypqa Qazaqstannyń tanymal jýrnalısi Gúlbaný Ánııatqyzy jáne onyń án salǵandy jaqsy kóretin erekshe balasy Aıtumar Sársenbek arnaıy qonaqqa shaqyryldy. Smart Class pedagogi Aıtumardyń dıagnozyna saı baǵdarlama daıyndap, ónerli qyzǵa mektep oqýshylarymen birge sabaq ótkizdi.
Eske sala keteıik, buǵan deıin Ekibastuz qalasyndaǵy 5 000-ǵa jýyq balany tegin oqytatyn «Samǵaý» ortalyǵy týraly jazǵan bolatynbyz.