Májilis depýtaty Bolatbek Najmetdınuly Qazaqstanǵa Qytaıdan kiretin avtokólikter úshin aqyly kirý tártibin engizýdi usyndy, dep habarlaıdy Egemen.kz.
Onyń aıtýynsha, qazirgi tańda eki el arasyndaǵy talaptarda aıqyn teńsizdik bar ekendigi baıqalady. Qazaqstanda tirkelgen kólik ıeleri Qytaıǵa kirer kezde ýaqytsha tirkeý rásiminen ótip, ýaqytsha júrgizýshi kýáligi men arnaıy nómirlik belgini alýy tıis. Sonymen qatar saqtandyrý rásimdelip, qujattar aýdarylyp, baqylaý-tekserý sharalarynan ótedi.
Al bul qyzmetterdiń barlyǵy aqyly negizde kórsetiledi.
«Bul rásimderdiń barlyǵy aqyly negizde júrgizilip, arnaıy qyzmetkerlerdiń shyǵyndaryn óteýge baǵyttalǵan. Qazirgi derekter boıynsha, bir avtokólikke qatysty barlyq rásimderdiń quny shamamen 8-9 myń ıýandy nemese 560 myń teńgeni quraıdy. Osylaısha Qytaı tarapy sheteldik kólikterdi baqylap qana qoımaı, resmı tabys ta tabady», dedi depýtat.
Bolatbek Najmetdınulynyń aıtýynsha, 2025 jyly jáne bıylǵy jyldyń alǵashqy tórt aıynda Qazaqstan aýmaǵyna 8 myńnan astam qytaılyq kólik kirgen. Depýtat Qazaqstan da osyndaı tásildi qoldansa, bıýdjetke shamamen 5 mlrd teńge kóleminde qosymsha kiris túsýi múmkin ekendigin aıtty.
Qytaılyq BYD brendi sapasyz avtokólikterdi keri qaıtaryp alatynyn málimdedi
Sondaı-aq ol bul usynys týrızmdi shekteýge baǵyttalmaǵanyn, kerisinshe quqyqtyq teńdik, qaýipsizdik máselerin retteýge múmkindik beretinin atap ótti.
Eske sala keteıik, buǵan deıin Qytaıdan BYD Destroyer 05 kólikterin ákelgen azamattar memlekettik kirister organdarynyń áreketine narazylyq bildirgen edi. Olardyń aıtýynsha, kólikter sol kezdegi zańnamaǵa saı rásimdelgenine qaramastan, keıinnen kedendik tólemder qaıta eseptelip, shottar buǵattala bastaǵan.