Jetisý oblysy Eskeldi aýdanynyń Qarabulaq aýylynda áýe elektr jelilerin qaıta qurý jumystary júrip jatyr. 1972 jyldan beri aýystyrylmaǵan elektr jelileri «Energetıkalyq jáne kommýnaldyq sektorlardy jańǵyrtý» ulttyq jobasy aıasynda jóndelip jatyr, dep habarlaıdy Egemen.kz.
EKSJ jobalyq keńsesiniń málimetinshe, jelide ótken jyldyń basynan beri 9 ret apat bolyp, jaryq óshken. Joba aıasynda Jetisý oblysynda 2026 jylǵa arnalǵan tek elektr energetıkasy salasynda 10-ǵa jýyq jobany iske asyrý josparlanǵan. Onyń ishindegi 3 joba Eskeldi aýdanyna tıesili. Bul jobalardyń jalpy quny shamamen 1,9 mıllıard teńgeni quraıdy.
Qurylys-montaj jumystary júrgizilip jatqan birinshi joba – aýdan ortalyǵy – Qarabulaq kentindegi 10/0,4 kV áýe jelisi. Bul jeliniń uzyndyǵy – 49 shaqyrym. Onyń iske qosylǵanyna 53 jyl bolǵan, endi ol tolyǵymen jańartylady. Qazirdiń ózinde josparlanǵan 1 104 temirbeton baǵananyń 800-i ornatylyp qoıdy. Jobany 2026 jyldyń naýryz aıynan qazan aıyna deıin iske asyrý josparlanǵan.
2035 jylǵa deıin Qazaqstanda 7 myń shaqyrym jańa elektr jelisi salynady
«Jobany iske asyrý mektepter, aýrýhanalar, balabaqshalar, mádenıet oshaqtary, ákimshilik ǵımarattar, sondaı-aq qarapaıym turǵyndar men óndiris oryndaryn qosqanda, jalpy 1 076 abonentti turaqty ári úzilissiz jaryqpen qamtamasyz etedi. Osy jumystardyń nátıjesinde apat qaýpi azaıyp, jaryqtyń óshýi sıreıdi, sonymen qatar kerneý sapasy artyp, elektr jelileri turaqty jumys isteıtin bolady», delingen Tabıǵı monopolııalardy retteý komıteti Jetisý oblysy boıynsha departamentiniń habarlamasynda.
Eldi mekende ulttyq joba aıasynda taǵy 2 joba iske asyrylmaq: birinshisi – uzyndyǵy 47,115 shaqyrym bolatyn áýe elektr jelisin qaıta qurý jumystary bolsa, ekinshisi – transformatorlyq qosalqy stansııany jańartý jumystary bolmaq.
Eske sala keteıik, bıyl Ulttyq joba boıynsha jalpy somasy 626,8 mlrd teńgege 130 shaqyrym jylý jelisin jáne 10 490 shaqyrym elektr jelisin jańǵyrtý kózdelgen.