«Astana – Kókshetaý – Petropavl» avtojolynyń ýchaskesinde jol-kólik oqıǵasy oryn aldy, dep habarlaıdy Egemen.kz
2026 jylǵy 3 maýsym kúni saǵat 17:00 shamasynda respýblıkalyq mańyzy bar «Astana – Kókshetaý – Petropavl» avtomobıl jolynyń 254-shaqyrymynda jol-kólik oqıǵasy tirkeldi.
Aldyn ala málimetter boıynsha, Kókshetaý qalasy baǵytyna qaraı qozǵalyp kele jatqan Toyota Alphard avtokóliginiń júrgizýshisi kólik quralyn basqarýdy joǵaltyp, qaýipsiz araqashyqtyqty saqtamaý saldarynan ózimen bir baǵytta qozǵalyp bara jatqan «Gazel» avtokóligimen soqtyǵysqan. Atalǵan kólik joldyń júrý bóliginde tańbalaý jumystaryn júrgizýdi súıemeldep júrgen.
Qordaı mańyndaǵy qaıǵyly jol apaty: Bir adam qaza tapty
Jol-kólik oqıǵasy saldarynan 5 adam zardap shekti. Zardap shekkenderdiń barlyǵy jedel medısınalyq járdem qyzmetimen Býrabaı aýdanynyń ortalyq aýdandyq aýrýhanasyna jetkizildi.
Oqıǵa ornyn tekserý barysynda jol ýchaskesiniń túzý, jol jabynynyń asfaltbetonnan ekeni anyqtaldy. Júrý bóliginde kólik qozǵalysyna áser etýi múmkin qandaı da bir aqaýlar tirkelgen joq.
Oqıǵa bolǵan ýaqytta atalǵan ýchaskede «QAJservıs» JShS Aqmola oblystyq fılıalynyń №88 jol paıdalaný ýchaskesi jol tańbalaryn salý jumystaryn júrgizip jatqan.
«QazAvtoJol» ulttyq kompanııasy júrgizýshilerdi belgilengen jyldamdyq rejımin saqtaýǵa, qaýipsiz araqashyqtyqty ustanýǵa jáne jol jumystary júrgizilip jatqan ýchaskelerde asa muqııat bolýǵa shaqyrady.
Jol-kólik oqıǵasynyń mán-jaıy ýákiletti organdar tarapynan anyqtalýda.