Jańa medısınalyq ortalyqtyń tanystyrylymy

Qazaqstan Respýblıkasy Prezıdenti Is basqarmasynyń Medı­sı­nalyq ortalyǵy emhanasynda «Chasen» dástúrli shy­ǵys medısınalyq ortaly­ǵy­nyń jumysyn tanys­tyrýǵa ar­nal­ǵan kezdesý bolyp ótti. 105-shi Koreıa medısına qyzmetiniń Qazaq­standaǵy kúnderi bıyl tamyzdyń 23-25-ine bel­gilengendikten, atalmysh kezdesý de osyǵan oraı­las­tyrylǵan edi. Kezdesýge Koreıa Respýblıka­sy­nyń Qazaqstan Respýblıka­syn­daǵy Tóten­she jáne ókiletti elshisi Lı Ben Hva, Koreıanyń «Komsta» úkimettik emes uıy­mynyń basshysy Kang Dont Chol jáne basqa da densaýlyq saqtaý me­ke­meleriniń ókilderi qatysty. «Chasen» dástúrli shyǵys me­dı­sı­nalyq ortalyǵynyń negizgi jumys­ta­ry omyrtqa súıekteri­niń aýrýlaryn emdik qasıetteri bar shóptermen emdeý, dástúrli shyǵys medısınasy arqyly saý­yq­tyrý, manýaldy terapııa, ıne shanshý jáne shyǵys medısı­na­synyń negizinde qurylǵan dene shynyqtyrý qımyldary arqyly ońaltý baǵyt­ta­rynda júrgi­zi­ledi. Kezdesýge kelgen Lı Ben Hva eki el arasyndaǵy yntymaq­tas­tyqqa keńinen toqtalyp, dıp­lo­ma­tııalyq baılanys­ta­ǵy medı­sınanyń alatyn ornyn erek­she atady. Ol óz sózinde: «Qa­zaqstan men Koreıa arasyndaǵy ózara yqpaldastyqtyń tereń tamyr jaı­ǵanyna bıyl 20 jyl tolyp otyr. Osy jyldar ishinde eki eldiń bolashaǵyna qatysty kóptegen keleli máselelerdi tal­qylap, dıplomatııalyq qarym-qa­ty­nasta salıqaly jumystar atqaryp kelemiz. Budan bylaı da barys-kelisi tek beıbit ári dos­tyq nıette bolaty­ny­na kámil senimdimin», dedi. Elimizde ashylyp otyrǵan «Chasen» dástúrli shyǵys medı­sı­nalyq orta­ly­ǵynyń jumysy jaıly Koreıanyń «Komsta» úkimettik emes uıymynyń bas­shysy Kang Dont Chol da arnaıy aı­typ ótti. «Ortalyqtan­dy­ryl­ǵan uıym 1993 jyldan beri jumys jasap keledi. Eń basynda óz jumysymyzdy tek alǵashqy medısınalyq kómek kór­setý túrinde júrgizgenbiz. Alaıda ýa­qyt óte kele kásibı mamandardy top­tastyrý arqyly halyq­ara­lyq deń­geı­de óz medısı­na­myz­dy nasıhattaıtyn deńgeıge jettik. Qazaqstan boıynsha bizdiń ortalyq osyǵan deıin tek Al­matyda jumys istegen. Halyq­tyń su­ra­nysyna saı aldaǵy ýa­qytta basqa da oblystarda orta­lyǵymyzdy ashsaq degen josparymyz bar», dedi ol. AQSh-ta, Egıpette, Batys Eý­ro­pa­nyń biraz elinde óz bólim­shelerin ashyp úlgergen bul ortalyqqa kómekti qajetsingen qarapaıym halyq qana emes, álemge tanymal sport jáne shoý-bıznestiń ókilderi de jıi atbasyn tireıdi eken. Araı ÚIRENIShBEKQYZY.