UAE SWAT Challenge-2026 halyqaralyq jarysy Qazaqstan úshin tolaıym tabys, jarqyn jeńistermen qorytyndylandy. Arnaıy jasaqtar arasyndaǵy «olımpıadaǵa» balanǵan doda bıyl Dýbaıda ótti. Qajyrly qaırat, temirdeı tártip, quralaıdy kózge atqan mergendik, jaýyngerlik qabilet synalatyn synǵa elimiz 5 qurama qosty. Tórtkúl dúnıe kóz tikken halyqaralyq jarystyń 5 kúninde el áskerıleri qazaq sarbazyna tán saıypqyrandyqpen tosqaýyldardy erkin eńserdi. Álemniń 48 elinen 100-den astam komanda jınalǵan dúbirli dodada KAZAKHSTAN S quramasy absalıýtti chempıon atansa, A toby ekinshi orynǵa taban tiredi. «Tomırıs» qyzdar quramasy erlermen ıyq tirestire saıysqa túsip, álemniń úzdik 20 quramasy sapynan tabyldy, dep jazady Egemen.kz.
Eldiń atyn shyǵarǵan erlerdiń erligi – memleketimiz úshin mańyzdy beles. Qazaqstan jasaǵynyń qajyrly qaıraty men ór rýhyn, taptyrmas taktıkalyq ázirligin Prezıdent Qasym-Jomart Toqaev ta joǵary baǵalady. El mereıin bıiktetken qurama qatarynda «Búrkit» arnaıy maqsattaǵy bólimshesiniń qyzmetkeri Islam da bar. Búrkenish esimin «Temir» dep tańdaǵan snaıper KAZAKHSTAN A sapynda saıys barysynda 2 ret rekord ornatyp kózge tústi. Áskerıler arasynda ekiniń biriniń ýysyna túspeıtin «kúreń beret» ıegeri daıyndyq barysy men alpaýyttar arasynda alǵa jetelegen kúsh týraly bizge áńgimelep berdi.
– Islam, UAE SWAT Challenge-2026 halyqaralyq jarysyndaǵy jeńis qutty bolsyn! Dýbaıdaǵy dodanyń Qazaqstan quramasy úshin mańyzy qandaı boldy?
– Kez kelgen el úshin aıbyndy ásker – qaýipsizdik pen táýelsizdik tiregi. Bizdiń elimiz áskerılerdiń ál-aýqatyn jaqsartý, tehnıkalyq-bazalyq qajettiliktermen qamtý, áskerı júıege zamanaýı tehnologııalardy engizý máselesine baıyppen qarap, árdaıym qoldaý kórsetip otyrady. Jahanda geosaıası ahýal qubylyp turǵan búgingi kezeńde kúshtik qurylymnyń jaýyngerlik ázirligi men materıaldyq bazanyń joǵary deńgeıde bolýy mańyzdy. Biz, aldymen osy maqsatta tynymsyz ter tógemiz. Al halyqaralyq arenada memleketimizdiń áskerı qurylymynyń daıarlyǵyn laıyqty deńgeıde pash ete alý – jaýapty mindet. Sondyqtan dúnıeniń ár buryshynan jınalǵan arnaıy jasaq bas qosatyn SWAT Challenge-deri – qanymyzda bar jaýyngerlik rýhty dáleldeıtin alań. Sondaı-aq tájirıbe almasyp, qarym-qabiletimizdi baǵamdaıtyn jarys bolǵandyqtan el namysyn abyroımen qorǵaýǵa kúsh saldyq.
– Álem jurtshylyǵynyń janary aýǵan básekege irikteý qalaı ótti, daıyndyq barysy qalaı uıymdastyryldy?
– Halyqaralyq doda bolǵandyqtan qurama qataryna Qazaqstanymyzdyń qaýqaryn shynaıy kórsete alatyn ókildiń qajet ekeni aıdan anyq. Osy mıssııa negizinde quramany irikteý jarty jyl buryn ótti. Aldyn ala arnaıy ázirlengen tapsyrmalardan tosylmaı ótken, sheberligimen kózge túsken eń myqty jigitter qatarǵa qosyldy. Al daıyndyq júıeli jospar negizinde órbidi. Nusqaýshylar fızıkalyq, atys jáne taktıkalyq daıarlyq turǵysynan qabiletimizdi shyńdady. Ár áskerıdiń qaýqaryn jeke baǵalap, olqy tustaryn ońaltýǵa kúsh saldy. Jyldamdyqty jetildirýge arnalǵan jattyǵýlar jıyny usynylyp, nysana kózdeý boıynsha da dáldik sheberligimizdi arttyrýǵa kóńil bólindi. Daıyndyq barysynda nusqaýshylar ár syrǵyǵan sekýndty óz paıdamyzǵa asyrýdy úıretti. Nátıje aıqyndaǵandaı, tııanaqty daıyndyq aqtalyp qana qoımaı, Qazaqstan qarýly kúshteriniń áskerı-taktıkalyq ázirligi halyqaralyq standarttarǵa saı ekeni aıqyndaldy.
– Kez kelgen komandalyq synda jeńis tuǵyrynan tabylý úshin qurama músheleriniń ázirligimen qatar mindetterdi ózara bólisý, tapsyrmany taýsyla oryndaý maqsaty oryndalýy kerek ekeni túsinikti. KAZAKHSTAN S quramasynda atalǵan fýnksııalar qalaı jikteldi? Topty jeńiske jetelegen ustanymdy aıtyp berińizshi.
– Durys aıtasyz, jeńis júıeli jospar sátimen, sapaly oryndalǵanda ǵana qanjyǵaǵa túsedi. Bizdiń qurama mindetterdi daıyndyq barysynda-aq qamdady. Mergen jáne shabýylshy mindeti áskerıdiń qyzmet etip júrgen laýazymyna sáıkes bólindi. Al kimniń, qandaı tapsyrmany oryndaıtyny daıyndyq kezinde ár adamnyń múmkindigine qaraı júkteldi. Menińshe, bizdiń toptyń jeńiske jetýine fızıkalyq jáne fýnksıonaldyq daıyndyqtyń joǵary deńgeıde bolýy septesti. Sondaı-aq psıhologııalyq turaqtylyq pen kásibı sheberlik, komanda músheleri arasyndaǵy senimdi taktıkalyq úılesimniń úlesi de jeńis úshin mańyzdy mánge ıe. Qurama arasyndaǵy jankeshtilik, birin-biri sózsiz túsiný, qoldaý, elimizdiń kók baıraǵyn álemdik arenada jetildirýge degen qulshynys ta úzdik nátıjege jeteledi dep oılaımyn.
– Jarystyń siz úshin kúrdeli bolǵan tusy men jarqyn sátteri týraly pikirińizdi de bilgimiz keledi...
– Jasyratyny joq, saıys barysynda qaýipti jattyǵýlar boldy. Top músheleri óz mindetin múltiksiz atqara alǵanynyń arqasynda mundaı sátterdi eńsere bildik. KAZAKHSTAN S sapynda úshin jarystyń ekinshi kúnindegi tapsyrmalardy 2 mınýtta oryndap, rekordtyq ýaqyt kórsetkishimen márege jetýimiz esten ketpes ádemi áser syılady. Sondaı-aq saıys barysynda 18 sekýnd ishinde 5-qabatqa kóterilip, nysanany joıǵanym, óz kezeginde bul nátıje tobymyzdyń jeńiske jetýine eleýli úles qosqany qýantady.
– Arnaıy jasaqtar arasynda ótetin «olımpıadaǵa» teńelgen bul básekede basty qarsylastaryńyz qaı memleketter boldy?
− Báseke bar jerde nátıje de jaqsara túsedi. Sondyqtan men báseke uǵymynyń jaǵymdy tustaryn qaperge alamyn. Básekelesý komandany ózara uıystyryp, maqsatqa bir baǵytta qaraýǵa múmkindik beredi. Al UAE SWAT Challenge-2026 halyqaralyq jarysynda Qytaı Halyq Respýblıkasynan kelgen arnaıy jasaq erekshe qabilettiligimen nazarymyzdy aýdardy. Sondyqtan osy elden kelgen qurama laıyqty qarsylyq kórsetti. Jarys qorytyndysy boıynsha atalǵan quramadan ozyp, ekinshi orynǵa turaqtadyq. Qytaı arnaıy jasaǵy úzdik úshtikti túıindedi.
– Al jeńiske jetkendegi kúıińiz ben áserińiz qandaı boldy?
– Jeńiske jetkendegi áserdi sózben jetkizý múmkin emes. Eń aldymen, elimizdiń abyroıyn asqaqta alǵanymyz úshin keýdemdi maqtanysh kernedi. Bul ǵajaıyp sáttiń artynda ýaqytpen sanaspaı jasalǵan ázirlik, eńbek jáne mańdaı ter tur. Biz kásibı qyzmetimizdi atqara júrip, halyq pen Memleket basshysynyń úmitin aqtaı aldyq. Osy sezim janymyzdy jadyratty.
– 16 aqpan kúni Prezıdent Qasym-Jomart Toqaev UAE SWAT Challenge-2026 halyqaralyq jarysynan júldeli oralǵan komandalardy Aqorda rezıdensııasynda qabyldap, saltanatty túrde marapattady. Joǵary deńgeıdegi qoldaýdy sezine aldyńyzdar ma, sondaı-aq Memleket basshysy alda taǵy qandaı mindetter júktedi?
− Prezıdentimiz ótken jyly nátıjeni jaqsarta túsýdi tapsyrǵan. Biz júktelgen tapsyrma údesinen shyǵa bildik. Al atalǵan rásimde Prezıdent «Jaýyngerlik erligi úshin» medalin keýdemizge taqty. Eńbektiń elengeni kimdi de bolsyn shabyttandyrady. Al Prezıdenttiń qolynan marapat alý – asa zor mártebe. Biz óz kezegimizde Dýbaı tórinde oljalaǵan kýbokti Memleket basshysy Qasym-Jomart Toqaevqa tabystadyq. Sondaı-aq joǵary qoldaýdy sezinip, keler jylǵy maqsatymyzdy taǵy bir ret shegeledik. Asylynda, chempıon bolý men chempıondyq ataqty qorǵap qalý tabandylyqty talap etedi. Keler jyly bıylǵy jeńistiń kezdeısoq buıyrmaǵanyn, naǵyz chempıon ataǵyna laıyq ekenimizdi dáleldeý mindeti tur.
– Áńgimeńizge raqmet!