Saltanatty shara K.Stanıslavskıı atyndaǵy orys drama teatrynyń sahnasynda ótti. Jalpy somasy 5 mln teńgeni quraıtyn oblys ákiminiń syılyǵy 22 nomınasııa boıynsha tabystaldy.
«Men búgin myna zalda jasaǵan eńbekteri zor ári baǵa jetpes tanymal ártisterdi, ataqty sýretshilerdi jáne rejısserlerdi, mádenıet qyzmetkerlerin kórip otyrmyn. Bizdiń Saryarqamyz ǵasyrlar boıy óz daryndylarymen áıgili. Qaraǵandy – elimizdiń mádenı ortalyqtarynyń biri. Bizdiń maqtan tutar tustarymyz jeterlik. Qaraǵandylyq ártister álem sahnalarynda óner kórsetedi, jergilikti teatrlarymyzdyń zaldary kórermenge toly. Bizdiń kitaphanalarymyz ben murajaılarymyz úlgili bolarlyqtaı», dedi oblys ákimi Erlan Qoshanov.
Mádenıet jáne óner qyzmetkerlerin marapattaý saltanaty keremet konsert túrinde ótti. Úmitkerler ishinen komıssııa músheleri eń úzdik degenderin iriktep shyǵarǵan. Olardyń árqaısysy oblys ákiminiń eki júz myń teńge kólemindegi syılyǵynyń laýreaty atandy.
Al eń negizgi «Mamandyǵyna adaldyǵy úshin» atty nomınasııa boıynsha 500 myń teńge kólemindegi arnaıy syılyq – Qazaqstannyń eńbek sińirgen ártisi, S.Seıfýllın atyndaǵy Qaraǵandy oblystyq qazaq drama teatrynyń jetekshi ártisi Qaırat Kemalovqa tabys etildi.
Mıras ASAN, «Egemen Qazaqstan»
Sýretterdi túsirgen D.Kýzmıchev