Táýelsizdiktiń 25 jyldyq tabysy – tolaıym. Ásirese, Elbasy júktegen ımporttyq ónimderdi almastyrýǵa jol tapqan qazaqstandyq taýaróndirýshiler tolqyny qýantady. Keler jyly qurylǵanyna 10 jyl tolatyn semeılik "Terra Vıta" jaýapkershiligi shekteýli seriktestigin de osy qatarǵa qosýǵa bolady. Onyń qyzmeti elimizdegi medısınalyq mekemelerdi zamanaýı medısınalyq qural-jabdyqtarmen jáne jıhazben qamtamasyz etýge baǵyttalǵan. 2007 jyly tirkelip, úsh jyldan keıin medısınalyq tehnıka óndirisine lısenzııa alǵan jańa nysan "Qazaqstannyń úzdik taýary" baıqaýyna úsh márte qatysyp, 2010 jáne 2011 jyldary qatarynan "Jańa ónim túrlerin shyǵarǵany úshin" dıplomdarymen marapattalsa, 2012 jyly óńirlik kórme baıqaýynda "О́ndiristik maqsattaǵy úzdik taýarlar" atalymy boıynsha úshtikke engen-di.
– Biz halyqaralyq standarttar men álemdik jetekshi kompanııalardyń jumystaryn zerdeleı otyryp, ishki naryq pen odan tys jerlerde otandyq óndirýshilerimizdiń oń kelbetin qalyptastyrýǵa óz úlesimizdi qosyp kelemiz, – deıdi kompanııa dırektory Nasıhat Isabaeva.
Árıne, júırik ýaqytpen birge medısınalyq tehnıka men jıhazdyń sapasyna, qyzmetine qoıylatyn talaptar kúsheıýde. Sondyqtan zaman údesinen shyǵýdy kózdegen "terravıtalyqtar" bul saladaǵy jańa da ozyq dúnıelerdi qadaǵalap qana qoımaı, qysqa merzim aralyǵynda joǵary tehnologııalardy óndiriske engizýge kúsh salýda.
– Búginde zaýytta óndiristi uıymdastyrýǵa qajetti ınfraqurylymnyń barlyǵy bar, onyń ishinde óndiristik jelilerdiń tehnıkalyq jabdyqtalýy oıdaǵydaı júzege asyryldy jáne daıarlyqtan ótken bilikti mamandar quramy jetkilikti. Taýardyń shyqqan jeri týraly sertıfıkat alý men memlekettik satyp alýǵa qatysýǵa qajetti qoldaýlar kompanııanyń qarqyndy damýyna jaǵdaı jasaıdy. Biz memlekettik tapsyrys sheńberinde ónimdi jetkizip beremiz, sondaı-aq ózge óńirlerden túsken jekelegen tapsyrystardy da belgilengen kestege saı sapaly oryndaımyz. Bul tutynýshylarymyz ben tapsyrys berýshilerdiń senimin arttyra túsedi, – deıdi Nasıhat Qabdyǵalıqyzy.
Kompanııa shyǵaratyn ónimder arasynda medısınalyq qyzmet kórsetýge arnalǵan kereýetter, gınekologııalyq jáne bosanýǵa arnalǵan kreslolar, balalar kereýeti men massaj ústelderi, manıpýlıasııalyq, zerthanalyq, emdik jáne hırýrgııalyq ústelder, salmaq jáne boı ólsheý quraldary, medısınalyq qalqa, tósek, shkaf, qozǵalmaly bakterısıdti sáýlelendirgish syndy medısınanyń san-salasyna arnalǵan ónimder bar. Semeılik kásiporyn Qazaqstan standarttaý ınstıtýtynyń nusqaýlary men talaptaryn jiti oryndap, farmasevtıkalyq naryqta batyl adymdap keledi. Aldaǵy ýaqytta TMD elderinde óndirilmeıtin ónimderimen ózge naryqty ıgermek. Atap aıtqanda, Reseı qalalaryna shyǵýdy josparlap otyrǵan kásiporynnyń eksporttyq áleýetin medısınalyq quraldardy zalalsyzdandyrýǵa arnalǵan keptirý shkafy, áıelder kabınetine arnalǵan avtomatty jabdyqtar men aýyr naýqastardy kútýge baǵyttalǵan robottandyrylǵan jabdyqtar arttyra túsedi degen senim bar. Sonymen birge medısınalyq jıhazdardyń ótimdiligin de synap kórýdi kózdep otyr.
Kásiporyn jetekshisiniń aıtýynsha, 2014 jyly "Damý" qorynyń baǵdarlamasymen ekinshi deńgeıli bankter arqyly 50 mıllıon teńgeden astam nesıege qosymsha jabdyqtar satyp alyndy. Jańa ónimder óndirýdiń de óz qıyndyqtary jeterlik. Máselen, ony tirkeýdiń ózi ýaqyt pen qarjyǵa tikeleı táýeldi. Qazirgi kezde kásiporyn operasııa ústeli men elektrli mehanıkamen retteletin kereýetti jasap shyǵyp, tirkeýden ótkizýde. Buǵan deıin bul múlikter syrtqy naryqtan tasymaldanyp kelgen edi. Kompanııa qazaqstandyq úlesti arttyrýǵa múddeli. Bul tarapta 67-70 paıyzǵa deıin otandyq ónimderdi tutynyp keledi. Mysaly, metall ónimderin "ArselorMıttal Temirtaý" AQ-dan alady. Sonymen birge "Terra Vıta" básekege tótep berýi úshin ár ónimge ózindik reńk, erekshelik berýdi jolǵa qoıǵan. Aıtalyq, jıhazdardyń qańqasy dástúrli jınalmaly qurylymmen emes, tutastaı jasaldy. Mundaı zattar basqa ónimderge qaraǵanda berik bolady, deıdi mamandar.
Dýman ANASh,
"Egemen Qazaqstan"