2003 jyly 9 jeltoqsanda Meksıkanyń Merıda qalasynda Birikken Ulttar uıymynyń resmı jáne tarıhı qujatyna – korrýpsııaǵa qarsy Konvensııaǵa qol qoıylǵan bolatyn.
Dúnıejúzindegi júzden astam el qoǵamdaǵy áleýmettik kesel – sybaılas jemqorlyqqa qarsy tize qosyp kúresýge sheshim qabyldady. Olardyń qatarynda Qazaqstan da boldy. BUU ókildiginiń taǵaıyndaýymen jyl saıyn álem elderi korrýpsııaǵa qarsy kúres kúnin atap ótedi. Qazaqstan Respýblıkasy memlekettik qyzmet jáne sybaılas jemqorlyqqa qasy is-qımyl agenttiginiń Qostanaı oblysy boıynsha departamenti áleýmettik keselge qarsy belgilengen halyqaralyq kúnge oraı keshendi sharalar uıymdastyrdy. Mysaly, jeltoqsan aıynyń basynan bastap oblystaǵy «Balalar jáne jastar uıymdary qaýymdastyǵy» uıymymen birlesip, aýdandar men qalalarda sybaılas jemqorlyqqa qarsy kúres týraly dóńgelek ústel májilisterin ótkizdi.
Keshendi sharalar oblys ortalyǵyndaǵy «Mıras» mádenıet úıindegi merekege arnalǵan saltanatty jıynǵa jalǵasty. Oǵan oblys ákimi Arhımed Muhambetov qatysty. «Elbasy Nursultan Nazarbaevtyń Qazaqstan halqyna arnalǵan Joldaýlarynda demokratııalyq qoǵamda sybaılas jemqorlyqqa qarsy kúres keleshek sıpaty bolatynyn atap kórsetken bolatyn. Osy áleýmettik jaǵymsyz qubylysqa qarsy kúres bizdiń elde de keshendi jalǵasyn tabady degen sóz. Sybaılas jemqorlyq eldiń ekonomıkalyq, ınvestısııalyq damý úderisin baıaýlatatyn, demokratııalyq eldiń saıası jáne qoǵamdyq ınstıtýttaryna keri áser etetin áleýmettik kesel.
Qazir osy áleýmettik jaǵymsyz qubylyspen kúreste negizgi kúsh onyń aldyn alýǵa, onyń kórinisterin barynsha azaıtýǵa baǵyttalyp otyr» dedi Arhımed Begenjanuly. Saltanatty jıynda agenttiktiń Qostanaı oblysy boıynsha departament basshysy, ádep jónindegi keńes tóraǵasy Berik Bekjanov baıandama jasap, departamenttiń atqarylǵan ıgilikti jumystary jóninde aıtyp ótti. Saltanatta qoǵamdaǵy sybaılas jemqorlyqqa qarsy mádenıetti, áleýmettik jaǵymsyz qubylysqa tózbeý ustanymyn qalyptastyrýǵa úles qosyp júrgen memlekettik qyzmetkerlerge, úkimettik emes uıymdar ókilderi men jýrnalısterge oblys ákiminiń, department basshylyǵynyń maqtaý qaǵazdary tabys etildi.
Názıra Járimbetova, «Egemen Qazaqstan»