Qazaqstandyqtar «Nurly jer» jańa baǵdarlamasy aıasynda turǵyn úı alý úshin jeńildetilgen nesıe ala alady. Bul týraly búgin QR Úkimet otyrysy barysynda turǵyn úı satyp alý úshin nesıelik mólsherlemesin sýbsıdııalaýdy qarastyratyn «Nurly jer» jańa baǵdarlamasynyń jobasyn talqylaý barysynda belgili boldy.
Úkimet otyrysynda Ulttyq ekonomıka mınıstri Qýandyq Bıshimbaev ıpotekalyq nesıelendirý naryǵyn jandandyrý maqsatynda azamattarǵa birinshi rettik turǵyn úıdi satyp alýǵa ekinshi deńgeıli bankter beretin ıpotekanyń paıyzdyq mólsherlemesin memlekettiń sýbsıdııalaýy qarastyrylyp jatqanyn baıandady. Máselen, 7 jyl boıy bankterdiń jylyna 17% joǵary emes syıaqy mólsherlemesin sýbsıdııalaý qarastyrylýda. Sońǵy qaryz alýshynyń ıpotekasyn 10% tómendetý úshin, memleket syıaqy qunynyń 7% deıin jabýdy qamtamasyz etetin bolady.
Sýbsıdııalar boıynsha qarajatty tıimdi paıdalaný úshin Astana jáne Almaty qalalarynda turǵyndardy nesıelendirýdiń 15 jylǵa deıin 20 mln. teńgege deıingi, al aımaqtarda - 15 mln. teńgege deıingi shekti somasy belgilenetin bolady. Osy sharttarmen nesıe boıynsha ortasha aı saıynǵy tólem Astana jáne Almaty qalalarynda – 158 myń, aımaqtarda – 116 myń teńgeni quraıtyn bolady. Sonymen qatar jeke qurylys salýshylardy yntalandyrý úshin qoljetimdi nesıelik resýrstardy paıdalaný maqsatynda memleket bankter beretin nesıeler boıynsha paıyzdyq mólsherlemeniń bir bóligi sýbsıdııalanatyn bolady.
Eske salaıyq, «Nurly jer» baǵdarlamasynyń negizgi maqsaty jeke turǵyn úı qurylysyn damytý, turǵyn úı qurylysy salymdary júıesi arqyly kóppáterli turǵyn úı qurylysyn odan ári salý, ıpotekalyq nesıelendirýdi damytý jáne jeke qurylys salýshylardy yntalandyrý bolyp tabylady.
Arnur ASQAR, "Egemen Qazaqstan".