Madrıdtiń «Real» klýby men Fransııa quramasynyń shabýylshysy Kılıan Mbappe 2026 jylǵy fýtboldan álem chempıonaty qarsańynda tizesine ota jasatýdan bas tartty, dep habarlaıdy Egemen.kz.
Ispanııalyq AS basylymynyń málimetinshe, Chempıondar lıgasynyń bıylǵy maýsymyndaǵy úzdik surmergenniń tize baılamyndaǵy máseleleri ótken jyldyń jeltoqsan aıynan beri mazalap keledi. Sońǵy ýaqytta jaraqaty asqynyp, ol «Benfıkaǵa» qarsy pleı-off kezeńindegi qarymta matchqa qatysa almady.
Dárigerler fýtbolshyǵa operasııa qajet ekenin aıtqanymen, 27 jastaǵy oıynshy buǵan úzildi-kesildi qarsy bolyp otyr. Sebebi ol 11 maýsym men 19 shilde aralyǵynda AQSh, Kanada jáne Meksıkada ótetin álem chempıonatyna tolyq daıyn bolmaýy múmkin dep qaýiptenedi. Al konservatıvti emdeý tásili naqty nátıje beretinine kepildik joq. Onyń ústine jattyǵý jáne oıyn júktemesi jaǵdaıdy odan ári ýshyqtyrýy yqtımal.
Qazirgi tańda bir nárse anyq – Mbappe álem chempıonatyna deıin «Real» sapynda da, Fransııa quramasynda da barlyq matchqa qatysa bermeıdi. Klýb pen ulttyq qurama saqtyq tanytyp, júktemeni azaıtýdy kózdep otyr.
Fýtbolshy madrıdtik klýbqa 2024 jyldyń jazynda «PSJ»-dan aýysqan. Kásibı mansabyn 2015 jyly «Monakoda» bastap, 2017 jyly parıjdik klýbqa ótken. Bıylǵy maýsymda ol klýb deńgeıinde 33 match ótkizip, 38 gol soqty (onyń 13-i Chempıondar lıgasynda), sondaı-aq alty nátıjeli pas bergen.
Ronaldýdyń rekordy qaıtalandy: Mbappe bir maýsymda 11 gol soqty
Chempıondar lıgasynda «Real» negizgi kezeńdi toǵyzynshy orynda aıaqtap, 1/8 fınalda portýgalııalyq «Sportıng» nemese aǵylshyndyq «Manchester Sıtımen» kezdesýi múmkin.
Ispanııa chempıonatynda 25 týrdan keıin madrıdtik komanda ekinshi orynda keledi, kóshbasshy «Barselonadan» bir upaıǵa qalyp otyr. Al Ispanııa kýboginde «Real» 1/8 fınalda «Albasetege» 2:3 esebimen ese jiberip, jarystan shyǵyp qaldy.
ÝEFA Temirlan Anarbekovty Mbappe men Holandtyń qataryna qosty
2026 jylǵy álem chempıonatynda Fransııa quramasy Senegal, Norvegııa jáne naýryz aıynyń sońynda anyqtalatyn qurlyqaralyq pleı-off jeńimpazymen bir topta oınaıdy.