Kóktem shyǵyp, kún jylynǵan saıyn kene qaýpi de kúsheıedi. Ásirese shóp qalyń ósken jerlerde, orman-toǵaı men taý bókterinde saq bolǵan jón. Mamandardyń aıtýynsha, keneler tabıǵat aıasyndaǵy demalys kezinde adamǵa ońaı jabysady, dep habarlaıdy Egemen.kz.
Densaýlyq saqtaý mınıstrligine qarasty Sanıtarlyq-epıdemıologııalyq baqylaý komıtetiniń málimetine sáıkes, bıyl kene shaǵýyna baılanysty 7 776 adam medısınalyq kómekke júgingen. Onyń ishinde 3 597-si – 14 jasqa deıingi balalar.
Dárigerler kene shaqqan jaǵdaıda ýaqyt joǵaltpaı, birden medısınalyq mekemege qaralý qajettigin eskertedi. Sebebi kene arqyly taralatyn vırýstar adam aǵzasyna shaqqan sátten bastap ene bastaıdy.
Kene ensefalıtinen qalaı qorǵaný kerek?
Mamandardyń sózinshe, kene taratatyn eń qaýipti aýrýlardyń biri – kene ensefalıti. Bul dert adamnyń júıke júıesin zaqymdap, aýyr asqynýlarǵa, múgedektikke, tipti ólimge alyp kelýi múmkin. Budan bólek, kene arqyly qaıtalamaly súzek, týlıaremııa jáne Kongo-Qyrym gemorragııalyq qyzbasy sekildi qaýipti ınfeksııalar da taralady.