Salyq kodeksine Quryltaı men Qazaqstan Halyq Keńesiniń qurylýyna baılanysty ózgerister engiziledi. Májilis Parlament depýtattary bastamashy bolǵan Salyq kodeksine ózgerister engizý týraly zań jobasyn birinshi oqylymda maquldady, dep habarlaıdy Egemen.kz.
Túzetýler Konstıtýsııa men «Konstıtýsııalyq Sot týraly» Konstıtýsııalyq zań normalaryn iske asyrý maqsatynda ázirlengen.
Zań jobasy aıasynda Salyq kodeksine bir palataly Parlament – Quryltaıdy qurýǵa, Qazaqstan Halyq Keńesin qalyptastyrýǵa, sondaı-aq keıbir konstıtýsııalyq normalarǵa sáıkes ózgerister engizý kózdelgen. Budan bólek, azamattardyń ótinishterin Konstıtýsııalyq Sotqa joldaý kezinde memlekettik bajdy alyp tastaý usynylyp otyr.
Qujatta quqyqtyq normalardyń mazmunyn ózgertpeı, redaksııalyq jáne tehnıkalyq naqtylaýlar da qarastyrylǵan. Atap aıtqanda, «sheteldik» termınin «sheteldik azamat» uǵymymen almastyrý, «tenge» sózin «teńge» dep birizdendirý, sondaı-aq aýmaq ataýlaryn kórsetý tártibin astanaǵa basymdyq bere otyryp retteý usynylǵan.
Sonymen qatar, salyq zańnamasyndaǵy ınstıtýsıonaldyq ataýlardy jańa konstıtýsııalyq modelge sáıkestendirý kózdelip otyr.
Budan bólek, Májilistiń jalpy otyrysynda «Notarıattyq qyzmet máseleleri boıynsha zańnamalyq aktilerge ózgerister men tolyqtyrýlar engizý týraly», «Mashına jasaýdy damytý máseleleri boıynsha zańnamalyq aktilerge ózgerister men tolyqtyrýlar engizý týraly» jáne «Áskerı qyzmetshilerdiń quqyqtyq jaǵdaıyn jetildirý, qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobalary qaralady.