Bestamaq aýylyndaǵy «Kóktas — Aqtóbe» AQ-ǵa qarasty «Aq qus» fabrıkasynyń jumys isteı bastaǵanyna on jyldyń júzi boldy. Bul fabrıka Batys óńirindgi broılerlik baǵyttaǵy birden-bir qus fabrıkasy bolyp tabylady. Munda óndirilgen qus eti óz óńirimizge, sondaı-aq, Mańǵystaý, Atyraý jáne Batys Qazaqstan oblystaryna ótkizilip keledi. Taıaý ýaqytta fabrıka qus etin Reseı jáne Qytaı naryǵyna shyǵarýǵa qadam jasaýda.
Jaqynda Táýelsizdiktiń 25 jyldyǵy qarsańynda kásiporynda jańa qus soıý sehy paıdalanýǵa berildi. Munyń ózi fabrıkanyń óndiristik qýatyn arttyrýmen birge, qus etin syrtqy naryqqa shyǵarýǵa múmkindik bereri sózsiz.
«Aq qus» fabrıkasyndaǵy jańa qus soıý sehynyń saltanatty ashylýyna arnalǵan jıynda sóz alǵan oblys ákimi Berdibek Saparbaev jańa óndiristik jeliniń paıdalanýǵa berilýimen quttyqtaı kelip, elimizde qus etine degen suranystyń artyp otyrǵanyn jetkizdi.
«Elbasy Nursultan Nazarbaevtyń tapsyrmasy boıynsha óz ónimderimizdi kóbeıtip, ımporttyń úlesin azaıtýymyz kerek. Basty maqsat – azyq-túlik qaýipsizdigin qamtamasyz etý. Bul baǵytta «Aq qus» fabrıkasynda jańa qus soıý sehynyń ashylýy úlken iske qosylǵan úles bolyp tabylady. Aqtóbe óńiri turǵyndarynyń qus etine degen suranysynyń 68 paıyzyn osy fabrıka beredi. Fabrıka osy kezge deıin jylyna 3 myń tonna shamasynda taýyq etin óndirip kelse, jańa sehtyń qýattylyǵy jylyna 10 myń tonna qus etin shyǵarýǵa múmkindik beredi. Iаǵnı, seh tolyq qýatynda iske qosylǵan kezde, «Aq qus» fabrıkasy óńir turǵyndarynyń suranysyn tolyq ótep qana qoımaı, óz ónimderin kórshi óńirler men syrtqy naryqqa da de shyǵaratyn bolady. Sondaı-aq, bıýdjetke salyq túsedi», – dedi óńir basshysy.
Jańa sehta 35 jańa jumys orny ashyldy. Jobanyń quny 1 mlrd 440 mıllıon teńge turady. «Aq qus» fabrıkasy basshylarynyń aıtýynsha, jumsalǵan qarjy úsh jyl merzimde óteletin bolady. Fabrıkadaǵy negizgi tehnologııalyq úderisi – ınkýbasııalaý. Aıyna úsh-tórt ret 31 myń jumyrtqa arnaıy shkaftarǵa qoıylady. Ázirge jumyrtqalar Reseıden jetkizilýde. Bul joba ónimniń ózindik qunynyn kemitýge qol jetkizedi dep kútilýde. «Kóktas - Aqtóbe» AQ basshylary bolashaqta mekıender ósirip, jumyrtqany da ózderi óndirýdi oılastyrýda. Sonda kásiporynnyń ónimderi anaǵurlym molaıady, tabysy da artady.
Osy jobany júzege asyrý barysynda kásiporynǵa memleket tarapynan qoldaý kórsetilgen. Atap aıtqanda, jalpy aýdany 1 gektar bolatyn, ınfraqurylymdarmen jabdyqtalǵan jer telimi bólingen.
Satybaldy SÁÝIRBAI,
«Egemen Qazaqstan»