14 jeltoqsan kúni elimizge Izraıl premer-mınıstri Bınıamın Netanıahý keledi. Bul týraly Ortalyq kommýnıkasııalar qyzmetinde ótken brıfıngte osy eldiń Qazaqstan Respýblıkasyndaǵy tótenshe jáne ókiletti elshisi Mıhael Brodskıı habarlady.
Bınıamın Netanıahý elimizdiń táýelsizdigin alǵan kezden beri Ortalyq Azııaǵa resmı saparmen kele jatqan Izraıldiń alǵashqy premer-mınıstri.
Baspasóz máslıhatynda dıplomat Izraıldiń dúnıejúzinde medısına, tehnologııa, aýylsharýashylyq jáne sý resýrstaryn basqarý salalarynda jetekshi oryn alyp, «High-Tech» eli degen ataqqa ıelenip otyrǵan memleket ekenin atap ótti. Sondyqtan eki el basshylarynyń kezdesýinde Izraıldiń tájırıbesi kóbirek sóz bolatynyn, al kásipkerlerdiń qatysýymen ótetin bıznes forýmda aýylsharýashylyq, medısına, energetıka, qaýipsizdik júıeleri men qorǵanys ónerkásibi salalaryndaǵy qazaqstandyq jáne ızraıldik iri kompanııalardyń basshylary kóptegen qujattarǵa qol qoıatynyn aıtty.
–Izraıl men Qazaqstan arasyndaǵy ekonomıkalyq ózara árekettestik keıbir salalarda tabystarǵa jetip otyr. «Izraılde jasalǵan» saýda tańbasymen, tampshylap sýǵarý júıeleri, jylyjaılar, qus fermalary, qaýipsizdik pen bıllıng júıeleri Qazaqstanda tanymal jáne keń qoldanýda. Osy forýmda aýyl sharýashylyq klasterin qurý, ekijaqty aýylsharýashylyq jobalardy damytýdyń qarjylyq mehanızmin qurý, tehnologııalyq jobalar transfertin jáne mańyzdy ózara ınvestısııalardy qoldaný sııaqty máseleler talqylanady,- dedi Mıhael Brodskıı.
Dastan Kenjalın, "Egemen Qazaqstan".