Aldaǵy ýaqytta memlekettik uıymdardyń sany qysqartylady. Bul týraly búgin Qarjy mınıstri Baqyt Sultanov Úkimet otyrysynda baıandady.
«Búgingi tańda memlekettik menshikte 7 myńǵa jýyq uıym jumys isteıdi. Olar – memlekettik kásiporyndar, aksıonerlik qoǵamdar, jaýapkershiligi shekteýli seriktestikter. Túgendeý nátıjeleri boıynsha memlekettik menshikti ońtaılandyrý 2 kezeńmen júrgiziledi. Aldymen memlekettik menshik uıymdarynyń sany 1 myńnan asa uıymǵa nemese 16 % qysqarady. Ekinshi kezeńde – taǵy 4 600-ge jýyq uıymǵa nemese bastapqy sanynan 65% azaıtý usynylady. Básekelestik ortaǵa berýden basqa ońtaılandyrýdyń quraly retinde uıymdar qaıta qurylady jáne jabylady», - dedi B.Sultanov.
Mınıstrdiń aıtýynsha, birinshi kezeńde uıymdar sany 1 136 kásiporynǵa qysqarady. Birinshi kezeńnen keıin memlekettik menshikte 6 myńnan kem kásiporyndar qalady. Qalǵan uıymdardyń negizgi bóligin balabaqshalar, kolledjder, aýrýhanalar quraıdy. Olar básekelestik ortaǵa ekinshi kezeńde usynylady. Qazir ákimdiktermen «pılottyq joba» retinde 94 uıymdy keıinnen satyp alý quqyǵynsyz senimgerlik basqarýǵa berý kelisildi.
«Satý boıynsha. Jeke menshikke 66 mlrd.teńge, onyń ishinde bıýdjetten memlekettik tapsyrys esebinen 28 mlrd. teńge jyldyq aınalymy bar qosymsha 105 uıym ótedi. Atalǵan obektiler bızneske tartymdy bolady, sebebi olardyń qyzmet túri naryqta bar. Bul aýylsharýashylyq ónimi, baspa, týrızm, sport, turǵyn-úı kommýnaldyq, sáýlet salasyndaǵy qyzmet. Kestege engizilgen 408 uıymdy esepke ala otyryp, bıznes 336 mlrd. teńge, onyń ishinde bıýdjet esebinen 119 mlrd. teńge jyldyq tabysy bar 513 uıymdy alady. Birinshi kezeńnen keıin memlekettik menshikte qalatyn 5 991 uıymnyń basym kópshiligin áleýmettik sala uıymdary quraıdy. Olardyń jartysyna jýyǵy (41%) balabaqshalar. Besinshi bóligin joǵarǵy oqý oryndary, kolledjder, qosymsha bilim berý uıymdary qamtıdy. 15% - teatrlar, murajaılar, mádenıet úıleri quraıdy. 13% - emhanalar men aýrýhanalar bolyp tabylady. Qalǵan uıymdar – monopolııalar, buqaralyq aqparat quraldary, veterınarlyq uıymdar jáne sol sııaqtylar», - dedi Qarjy mınıstri.
Mınıstrdiń aıtýynsha, Bilim týraly zańnamaǵa tıisti ózgerister engizilgennen keıin 2018 jyly kolledjder úlken kásiporyndarǵa jáne ýnıversıtetterge senimgerlik basqarýǵa usynylatyn bolady. 2017-2020 jyldary senimgerlik basqarýǵa 124 emhanany berý josparlanýda. Ekinshi kezeńdi júzege asyrý úshin memlekettik múlik, bilim, densaýlyq saqtaý jáne basqa quqyqtyq aktilerge túzetýler engizýdi qajet etedi. Sondyqtan, ekinshi kezeń boıynsha qysqartý 2017-2019 jyldar kezeńin qamtıdy. Bul sharalar bıýdjettik shyǵystardy jáne memlekettik aktıvterdi basqarýdyń tıimdiligin arttyrady.
Dınara Bitikova, "Egemen Qazaqstan"