«Astana» komandasynyń jartylaı qorǵaýshysy Roher Kanıas «Sovetskıı sport» basylymyna bergen suhbatynda Italııanyń «Ýdıneze» komandasymen aradaǵy sátsiz transferi, Almatynyń «Qaıratymen» qarsylastyǵy jáne Qazaqstannyń dástúrine degen kózqarasy týraly aıtyp berdi.
2009 jyly Kanıas Kolýmbııanyń chempıony atanǵannan keıin óz kúshin Eýropada synap kórmek bolady. Biraq túptiń-túbinde ýáde etilgen A Serııasynda emes, «Sibir» komandasyna aýysýǵa týra keledi. Ol reseılik klýbta bir maýsym ǵana óner kórsetse de, jankúıerlerdiń ystyq yqylasyna bólengen oıynshylardyń biri boldy. Al sońǵy tórt jylda Qazaqstanda óner kórsetip júr. Munda ol úsh márte el chempıony atanyp úlgerdi. Qaraǵandynyń «Shahterimen» bul ataqqa bir ret qol jetkizse, qalǵan úsheýin «Astanamen» jeńip aldy.
Ol «Astana» men «Qaırat» arasyndaǵy kezdesýdi qazaqstandyq El-Klassıkoǵa teńedi. Al «Iаng Boızdan» 0:3 esebimen utylǵanyna qaramastan maýsymnyń sátti aıaqtalǵanyn jasyrmady. «Bir jylda eki kýbokty jeńip alý – eń joǵarǵy kórsetkish. Bári-bir shveısarlarmen ótken kezdesý eshnárseni sheshpes edi. Jalpy alǵanda bul maýsym biz úshin oıdaǵydaı ótti. Al keler jyly Chempıondar lıgasynda jaqsy óner kórsetetin múmkindigimiz bar», – dedi kolýmbııalyq fýtbolshy.
Reseı halqy Anatolıı Tımoshýk pen Andreı Arshavın oınaıtyn «Qaırat» jaıly jaqsyraq biledi. Almatylyq ujymmen ótetin oıyndar qanshalyqty qıyndyq týdyrady degen suraqqa: «Bul matchtardy qazaqstandyq El-Klassıko dep atasam qatelespegen bolar edim. Beıne-bir «Barselona» men «Real» arasyndaǵy match sııaqty. Bir ereksheligi – Qazaqstanda ótedi. Qaısy birimiz jeńiske jetsek, chempıonatty utyp alǵandaı sezimde qalyp jatamyz» – dedi ol.
Jasyl alańda emes appaq qardyń ústinde ótken Qazaqstan kýbogynyń fınaly báriniń esinde bolar. Kanıas ony da umyt qaldyrmaı, tilge tıek ete ketti: «Rasymen, aýa raıy óte qatty áser etti. «Qaırattyń» jerinde ótkendikten bul jeńis biz úshin mańyzdy boldy. Jankúıerler «jan alysyp, jan berisken» oıynnyń kýási boldy degen oıdamyn», – dedi 26 jastaǵy fýtbolshy.
О́tkenge qaıta oralǵan kolýmbııalyq aıaqdopshy «Ýdınezemen» aradaǵy sátsiz transferi jaıly áńgimeledi: «Eýropada meni daıyn kelisimshart kútip tur dep san soqtyryp ketken adamdar boldy. Bul ýaqytta transfer ýaqytynyń aıaqtalyp qalǵan sáti bolatyn, sondyqtan Latvııaǵa baryp, bir-eki aı oınaý jóninde usynys aldym. О́z deńgeıimdi tómendetip almas úshin «Tranzıt» komandasynan bir-aq shyqtym. Mine, sol jaqtan Reseıge aýysý jaǵyn qarastyrdym», – dedi.
Al «Sibir» komandasyna aýysqandaǵy áseri múldem bólek eken: «О́te ádemi jáne úlken qala. Bir aýyz sóz bilmeıtindigime qaramastan Reseıde meni jaqsy kútip aldy. Komanda óte uıymshyl eken. Áriptesterimniń arqasynda tez sińisip kettim. Bir qıyndyǵy bul jaqta aýa raıy óte salqyn, jylyný úshin jıi-jıi kofe iship júrdim (kúldi)», – dedi Roher.
Reseıden keıin Kanıas birden Qazaqstanǵa kele salǵan joq, Polshanyń «Iаgellonııa» komandasyna aýysty. Bul jóninde ol: «Munda jaǵdaı qıyndaý boldy. Meni satyp alǵan basqa jattyqtyrýshy bolatyn. Polshaǵa kelgenimde ol kisini aýystyryp jiberip, jańa jattyqtyrýshy kelipti. Al jańa bapker maǵan senim artpaıtynyn aıtyp, el kýbogynda oınaýǵa 45 mınýt qana ýaqyt berdi. Budan ózge eshnárse bolmady. Mine, osy tusta Qaraǵandynyń «Shahterinen» túsken usynys meni úlken tyǵyryqtan shyǵardy. Al jańa komandamda bári alǵa qaraı basty», – dep esine aldy.
«Shahter» match aldynda Qudaıǵa arnap, qoı soıatyndyǵymen álemge tanyldy. Buǵan tez úırenisip kettińiz be degen suraqqa: «Ár ulttyń ózindik salt-dástúrine qurmetpen qaraı bilý kerek dep oılaımyn. Bul erekshe ári ózindik máni bar dástúr. Budan ómirlik tájirıbe aldym», – dedi jartylaı qorǵaýshy.