Ortalyq kommýnıkasııalar qyzmetinde qolóner jáne Qazaqstan ekonomıkasyn ártaraptandyrýdyń áleýetin arttyrýǵa arnalǵan baspasóz máslıhaty ótti.
Oǵan Birikken Ulttar Uıymy Damý baǵdarlamasynyń (BUUDB) turaqty ókiliniń orynbasary Mýnhtýıa Altangerel, Qazaqstan qolóner sheberleri odaǵynyń tóraıymy Aıjan Bekqulova, «Shevron» kompanııasynyń ókili Aınur Sydyqova, «Koalısııa «jasyl ekonomıka» jáne G-Global»-dy damytý úshin» ZTB tóraıymy Saltanat Rahymbekova qatysty.
Mýnhtýıa Altangerel hanymnyń aıtýynsha, qolóner salasyn nasıhattaý jáne sheberlerdiń múmkindikterin arttyrý, Qazaqstan ekonomıkasyn ártaraptandyrýǵa aıtarlyqtaı úles qosýy múmkin.
–BUU Damý baǵdarlamasy qolóner kásibin kóptegen jyldar ishinde qoldap keledi. Degenmen, naǵyz júıeli jumys shamasymen úsh jyl buryn Birlesken óńirlik damý baǵdarlamalarynyń aıasynda Shyǵys Qazaqstan, Qyzylorda jáne Mańǵystaý oblystarynda bastaldy. Sonymen qatar, biz búkil eldiń sheberlerin qoldaýǵa mindettimiz dep sanaımyz. Biz 200 astam qolóner sheberlerin qamtyp, olarǵa Qazaqstanda jáne shetelde granttar men arnaıy trenıngterdi usynamyz jáne olardyń buıymdaryn shyǵarmashylyq jármeńkelerde satylýyna yqpal etemiz. Biz qoldaǵan kem degende 30 qolóner sheberleri Ekspo-2017 aıasyndaǵy sharalarǵa qatyspaq. Barlyq qoǵam múshelerin qolóner sheberlerin qoldaýǵa shaqyramyz, óıtkeni Qazaqstanda osy ádemilik jáne mádenı mańyzdylyǵy boıynsha ǵajaıyp salanyń áleýeti áli múlde júzege asyrylmaǵan. Máselen, Indııada kásipshilik salasy jumys oryndarynyń 20 paıyzǵa jýyq kólemin qamtıdy. Onyń aıtarlyqtaı bóligi – aýyldyq jerlerde, al Iranda qolóner sheberleri JIО́ 3 paıyz qamtamasyz etedi, - dep málimdedi Mýnhtýıa Altangerel.
Al «Shevron» kompanııasynyń ókili Aınur Sydyqovanyń aıtýynsha, amerıkalyq kompanııa elimizge 1993 jyly kelip, jas táýelsiz memleketke senim jáne qoldaý bildirgen alǵashqy iri batys ınvestory boldy.
–Búgingi kúni «Shevron» Qazaqstanda energoresýrstardy óndirýde emes, jergilikti qolóner sheberlerin qoldaý maqsatynda da tyǵyz baılanys jasap keledi. 2006 jyldan bastap elimizdiń túkpir-túkpirinen jınalǵan 1000-nan astam sheber bıznes-josparlaý, marketıng, uıymdastyrý jáne kásibı damý boıynsha trenıngterden ótti. 2009 jyldan bastap biz «Sheber» sheberlik baıqaýyn ótkizemiz, – dedi ol.
Baspasóz máslıhatyna qatysýshylar, sondaı-aq, 17-18 jeltoqsan kúnderi «Kerýen» saýda oıyn-saýyq ortalyǵynda «Sheber-Kerýen» festıvali ótetini týraly habarlady. Festıval aıasynda Qazaqstannyń 70 úzdik qolóner sheberleriniń, onyń ishinde múgedek sheberlerdiń buıymdary jármeńkege shyǵarylyp, «Sheber-2016» 8-shi respýblıkalyq sheberler baıqaýy jeńimpazdaryn saltanatty túrde marapattaý rásimi, etno-stıl baǵytynda sán dızaınerleriniń kórsetilimderi, tegin sheberlik sabaqtar jáne basqa da mádenı sharalar uıymdastyrylady.
Dastan KENJALIN, «Egemen Qazaqstan».