Táýelsizdik kúni qarsańynda, 10 jeltoqsan kúni Qyzylorda oblysynyń ákimi Qyrymbek Kósherbaev Qarmaqshy aýdanynyń ortalyǵy Josaly kentiniń 25 turǵynyna jeke turǵyn úı qurylysyn júrgizý úshin jer teliminiń qujattaryn tapsyrdy.
Oblys ákimi óziniń alǵysózinde jergilikti bılik aldymen aýyldyq ekonomıkany damytýǵa jáne aýyl jurtshylyǵynyń ómir súrý deńgeıin jaqsartýǵa basymdyq beretindigin jetkizdi.
- El damýynyń negizgi kórsetkishteriniń biri - turǵyn úı qurylysynyń qarqyndy damýy. О́tken jyly Almaty qalasynda 51 kópqabatty úı salynsa, Qyzylordada 53 kópqabatty úı turǵyzyldy. Bıyldyń ózinde kópqabatty 80 úı salynyp jatyr. Qyzylorda qalasynda páter kezeginde turǵandardyń 28 paıyzy, ıaǵnı úshten biri baspanaly boldy. Josaly kentinde 25 myń halyq turatyn bolsa, onyń 1380-i jeke turǵyn úı salý úshin jer telimin alýǵa ótinish bergen. Aýdan ortalyǵynan barlyq ınjenerlik-kommýnıkasııasy daıyn 1400 jer telimi bólinip berildi,- dedi oblys ákimi.
Aýdandyq ardagerler keńesiniń tóraǵasy K.Esdaýletov sóz sóılep, aımaq basshysyna aýyldyń áleýmettik máseleleriniń der kezinde oń sheshimin tabýyna kómek kórsetkeni úshin alǵysyn bildirdi, Elbasynyń sarabdal saıasaty men reformalaryna qaýym bop qoldaý kórsetetindikterin jetkizdi. Munan soń QR Táýelsizdik kúni men Josaly kentindegi bolashaq shaǵyn aýdannyń negizi qalanǵan kúnniń qurmetine arnalyp merekelik sharalar uıymdastyryldy.