Álem kóshbasshylary Qazaqstan Prezıdentin Táýelsizdik merekesimen quttyqtaýda

Memleket basshysy Nursultan Nazarbaevtyń atyna Qazaqstan Táýelsizdiginiń 25 jyldyǵyna oraı quttyqtaý jedelhattary kelip túsýde, dep habarlady Prezıdenttiń baspasóz qyzmeti.

Germanııa Federatıvtik Respýblıkasynyń Prezıdenti Ioahım Gaýk óz quttyqtaýynda Qazaqstannyń táýelsizdik alǵannan beri qarqyndy damyp kele jatqanyn atap ótken. «Kópultty Qazaqstan qoǵamyndaǵy beıbitshilik pen kelisim elderińizdiń órkendeýine qolaıly jaǵdaı týǵyzyp otyr. Germanııa Qazaqstannyń senimdi seriktesi bolyp qala beredi jáne demokratııa men zańnyń ústemdigi jónindegi saıası únqatysýdy jalǵastyrýǵa nıetti», - delingen jedelhatta. Sondaı-aq, Koreıa Respýblıkasynyń Prezıdenti Pak Kyn He respýblıkamyzdyń azamattaryn quttyqtap, eki el halqynyń dostyǵy odan ári nyǵaıa berýine tilektestik bildirdi. «Qazaqstan Prezıdentiniń ótken aıdaǵy memlekettik sapary elderimiz arasyndaǵy osy jyldarda úzdiksiz damyp kele jatqan strategııalyq áriptestiktiń odan ári nyǵaıa túsýine septigin tıgizdi dep oılaımyn. Qazaqstan Respýblıkasyna baıandy ǵumyr men baq-bereke tileımin», - delingen quttyqtaý jedelhatynda.