Astana qalasynyń turǵyndary men qonaqtary bıyl qysta tórt muz qalashyǵyn qyzyqtaı alady, dep habarlady Astana qalasy ákimdiginiń mádenıet basqarmasy.
Qaladaǵy muz qalashyqtarynyń qurylysy qarqyndy júrip jatyr. Muz qalashyq elimizdiń bas shyrshasy jaǵylǵan 18 jeltoqsannan bastap ashylady.
Qalalyq mádenıet basqarmasynyń habarlaýynsha, bıyl muz qalashyqtar «Han shatyr» oıyn-saýyq ortalyǵynyń janynda, qalalyq ákimdik janyndaǵy alańda, Esil ózeniniń jaǵalaýynda, «Stýdentter» parkiniń janynda ornalaspaq.
«Byltyrǵy tájirıbege súıenek, qala halqy muz qalashyqtarǵa óte kóp barǵan. Sondyqtan, bıyl da mereke kúnderi men demalys kezinde halyqqa arnap ár túrli kóńil kóterý baǵdarlamalaryn, fleshmobtar men jarystar uıymdastyrmaqpyz. Bul sharalardyń maqsaty – elorda halqynyń demalysyn kóńildi etý ári salaýatty ómir saltyn qalyptastyrý», – deıdi mádenıet basqarmasynyń baspasóz qyzmeti.
Bıyl Astanada Jańa jyl merekesine arnalǵan bas shyrsha Táýelsizdik kúninen keıin, 18 jeltoqsanda «Han shatyr» oıyn-saýyq ortalyǵynyń janynda jaǵylady. Jyl saıyn shyrsha 1 jeltoqsan kúni Elbasy Nursultan Nazarbaevtyń qatysýymen janatyn. Bıyl Táýelsizdiktiń 25 jyldyǵyna oraı, qala aldymen Táýelsizdik merekesine daıyndalyp jatyr.
Elordada Jańa jyl merekesine oraı barlyǵy 17 shyrsha ornatylady. Bir ǵana Esil aýdany men Úrker, Qalamańy turǵyn alqaptarynda 10 shyrsha ornatý josparlanǵan. Bıylǵy jańajyldyq bezendirýdiń basty nyshany - Taýyq qana emes, elimizdiń basty oqıǵasy - EKSPO kórmesi de bolady.
Aıta keteıik, Astanada ashyq aspan astyndaǵy eń úlken muz aıdyny «Araı» saıabaǵynda salynyp jatyr. 250 adamǵa arnalǵan muz aıdynynyń jalpy aýmaǵy - 5 myń sharshy metr.