Qyrǵyzstan Eýrazııalyq ekonomıkalyq odaqqa ený kezinde respýblıkany beıimdeý úshin qarastyrylǵan 100 mln dollar tehnıkalyq kómek bólý jóninde Qazaqstanmen kelisimshartqa qol qoıdy, dep málimdedi seısenbi kúni qyrǵyz premeriniń orynbasary Oleg Pankratov tilshilerge, dep jazady abctv.kz.
«Keshe 100 mln dollar tehnıkalyq kómek bólý jóninde Qazaqstanmen arada qujatqa qol qoıdyq. Ol qarajat veterınarlyq qaýipsizdikke baılanysty máselelerge baǵyttalady», – dep málimdedi ol.
Qyrǵyz sheneýnigi atap ótkendeı, respýblıka EAEO-ǵa qosylǵan kezde Reseı men Qazaqstan ótkizý pýnkteri men zerthanalardy jańǵyrtýǵa qarjy bólýdi ýáde etken.
«Reseı tarapynan qujat iske asýda, qarastyrylǵan 200 mln dollar qarajat transhpen túsip jatyr. Qazaqstanmen 100 mln dollarǵa dál osyndaı kelisimge kúni keshe ǵana qol qoıyldy», –dep atap ótti ol.
Oleg Pankratovtyń aıtýynsha, «elder arasynda temirjol tasymaly barysynda bryńǵaı kedendik tarıfti qoldaný týraly kelisimge qol qoıdy. Bıyl jyl boıy júrgizilgen kelisim, kelissóz Qazaqstan aýmaǵy arqyly Reseıden strategııalyq mańyzdy taýarlardy jetkizýdi arzandatýǵa baǵyttalǵan. Ol janar-jaǵarmaı, metal jáne aǵash». Onyń aıtýynsha, Qazaqstan ázirshe qyrǵyz-qazaq shekarasynda ótkizý pýnkterinde mal veterınarlyq baqylaýdy alyp tastaýdy qoldap otyrǵan joq.