Qazaqstan Respýblıkasynyń Prezıdenti Nursultan Nazarbaev «Aıaz Ataǵa hat jaz» jobasyn qoldady, dep habarlaıdy Aqordanyń baspasóz qyzmeti áleýmettik jelide.
Belgili bolǵandaı, 2014 jyldan beri «Qazposhta» AQ júzege asyryp jatqan atalmysh joba aıasynda árbir adam kelip, balalardyń hatyn tańdap alyp, olardyń tilekterin oryndaýǵa bolady. Osymen ekinshi jyl qatarynan Memleket basshysy osy jobaǵa qoldaý kórsetip, jas qazaqstandyqtardyń armandaryn oryndaýda.
Bıyl Nursultan Nazarbaev pavlodarlyq Ardaq Shalabaevtyń Aıaz Ataǵa jazǵan hatyndaǵy «EKSPO-2017» kórmesine bılet suraǵan tilegin oryndady.
Keler jyldyń basty oqıǵalarynyń biri halyqaralyq kórmeni joǵary dárejede ótkizý bolyp tabylady. Osyǵan oraı, Memleket basshysy 11 jasar Ardaqty qýantqysy kelip, Astanadaǵy EKSPO-ǵa 4 bılet syılady.
Atyraý oblysy Mahambet aýdanyndaǵy arnaıy mektep-ınternatynyń tárbıelenýshisine Elbasy ózi úırenýge arnalǵan tigin mashınasyn, sondaı-aq doptar, raketkalar men basqa da sporttyq zattardy syıǵa tartty. Qyzylorda qalasy Tasbógent kentindegi 6 jasar Nurıslam Serikovtiń de haty jaýapsyz qalmady. Elbasy oǵan balalar ádebıeti men «Lego» konstrýktoryn syılaýdy uıǵardy.
Jalpy, «Aıaz Ataǵa hat jaz» naýqany Jańa jyl qarsańyndaǵy jas qazaqstandyqtardyń tilekterin oryndaýǵa zor múmkindik týdyrýda. Kóptegen qazaqstandyqtar Memleket basshysynan úlgi alyp, myńdaǵan balaqaıdyń armandaryn oryndaıdy degen úmittemiz.
Aıta keteıik, atalmysh jobanyń áleýmettik mańyzy zor. Sebebi, bizdiń azamattarǵa az qamtylǵan otbasylardan shyqqan, múgedek jáne jetim balalardyń tilekterin oryndaýlaryna bolady.