Aqtóbede zamanaýı jabdyqpen jaraqtandyrylǵan ekstrokorparaldy uryqtandyrý ortalyǵy ashyldy, dep habarlady oblys ákimdigi.
Aqtóbede aımaqtaǵy birinshi EKU ortalyǵy ashyldy. Oblystyq konsýltasııalyq-dıagnostıkalyq perınataldyq ortalyq bólimshesiniń iske qosylýyna Aqtóbe oblysynyń ákimi Berdibek Saparbaev qatysty.
Mańyzdy nysan QR Táýelsizdiginiń 25 jyldyǵyna oraı paıdalanýǵa berilip otyr. Bul maqsatta oblystyq bıýdjetten 420 mln. teńge bólindi. Biregeı ortalyq eń ozyq quraldarmen jabdyqtalǵan barlyq halyqaralyq talaptar men standarttarǵa saı keledi. Reprodýktolog, embrıolog, ýrolog-androlog sekildi mamandar reprodýktıvtik medısına ınstıtýtynda jáne alys jáne jaqyn shetelderdegi mamandandyrylǵan klınıkalarda oqytylǵan.
"Búginde Qazaqstanda bala kótere almaıtyn áıelderge ana baqytyn sezinýge kómektesý úshin eń ozyq tehnologııalar men ınnovasııalardy qoldaný arqyly kómek kórsetilip jatyr. Bul qoldaý memleket basshysynyń tapsyrmasy boıynsha jasalýda. Bizdiń oblysymyzda 2000-nan astam jup bedeýlik esebinde tur. Olardyń 600-ge jýyǵy ekstrokorporaldy uryqtandyrýǵa zárý. Ortalyqta osy ıgilikti iske qyzmet etetin eń úzdik mamandar jumys jasaıtyn bolady. Aldaǵy birneshe jylda Aqtóbe medısınalyq qyzmet kórsetýde Batys Qazaqstandaǵy ortalyqqa aınalýy tıis", - degen oblys ákimi ortalyqtyń aldyna birneshe mindetter qoıdy.
Berdibek Saparbaev jańa nysandy aralap, onyń biregeı múmkindikterimen tanysty.
"Bul jerde náresteni múgedektikke ákelýi múmkin týa bitken aqaýlardy aldyn-alý úshin qajetti qural-jabdyqtar bar. Perınataldyq ortalyǵynyń qurylysy aıaqtalǵannan keıin, elektrondy derekter bazasyn iske qosylatyn bolady jáne árbir áıel esepke alynady" - dedi aımaq basshysy.
Mamandar óz kezeginde oblys ákimine osyndaı mańyzdy jobany júzege asyrýda qoldaý kórsetkeni úshin alǵystaryn bildirdi.
2017 jyly jergilikti bıýdjet esebinen 50 otbasylyq jupqa EKU prosedýrasyn júrgizý josparlanyp otyr.