«Lester Sıtı» – APL chempıony
Klaýdıo Ranerı jattyqtyratyn "Lester Sıtı" óz tarıhynda alǵash ret Anglııa premer-lıgasynyń chempıony atandy. 2015/16 maýsymynda Anglııa premer-lıgasynyń aýysýyna eki týr qalǵanda «Chelsı» men «Tottenhem» arasynda ótken match 2:2 esebimen aıaqtalyp, lesterlikterdiń chempıon atanýyna septigin tıgizdi. О́tken maýsymda aǵylshynnyń derjava komandalarynda da birqatar ózgerister boldy. Maýsym aıynda «Lıverpýl» bas bapkerin aýystyrdy. «Manchester Iýnaıtedtiń» jaǵdaıy komanda bapkeri Ser Aleks Fergıýsen ketkeli ońalmady. «Manchester Sıtı» joǵary deńgeıde óner kórsete almady. Al «Arsenal» maýsym barysynda jibergen qatelikterinen soń jeńis tuǵyryna kóterile almaı, ekinshi oryndy qanaǵat tutty. «Lester Sıtıdiń» jalǵyz qarsylasy «Tottenhem» bolatyn. Biraq londondyqtar, tipti, ekinshi oryndarynan da aıyrylyp qaldy. Mine, osylaısha «Lester Sıtı» qarsylastarynyń qatelikterin tıimdi paıdalana bilip, mamyr aıynda chempıondyq kýbokqa qol jetkizdi. Sonymen qatar, «túlkilerdiń» shabýylshysy Djeımı Vardı 11 match qatarynan gol soǵyp, áıgili Rýd Van Nıstelroıdyń rekordyn jańartty.«Real» – Chempıondar lıgasynyń jeńimpazy
Madrıdtik ujym úshin maýsym oıdaǵydaı bastala qoıǵan joq. Karlo Anchelottıdiń ornyna kelgen Rafael Benıtes koroldik klýbty durys basqara almady. Soraqasy sol Ispanııa kýbogynyń 1/16 fınalynda «Kadıs» komandasyna qarsy oıynda dıskvalıfıkasııa alǵan Denıs Cheryshevti alańǵa shyǵarǵany úshin jarystan shettetildi. Buǵan qosa, óz alańdarynda ejelgi qarsylasy «Barselonadan» 0:4 esebimen oısyraı utylǵany taǵy bar. Jankúıerler tarapynan jıi synǵa ushyraǵandyqtan qańtar aıynyń basynda «Real» prezıdenti fransııalyq Zınedın Zıdandy bas bapker etip taǵaıyndady. Mine, osydan keıin madrıdtikterdiń oıynyna jan bitip, burynǵy qalpyna qaıta keldi. Fýtbolshy retinde jankúıerleriniń ystyq yqylasyna bólengen Zıdan bapker retinde de úlken jetistikterge jetti. Ispanııa chempıony ataǵy men el Kýbogyn «Barselonadan» ala almasa da kil myqtylar aıqasatyn Chempıondar lıgasynda jeńiske jetti. Fınalda olar «Atletıkony» 1:1 (penaltı 5:3) esebimen utyp, kýbokty tarıhynda 11-márte jeńip aldy. Al Eýropa lıgasynyń ıegeri atanǵan «Sevılıamen» ÝEFA Sýperkýbogynda kezdesip, 3:2 esebimen basym tústi. Sonymen qatar, jaqynda klýbtar arasyndaǵy álem chempıonatynda da shoqtyǵy bıik boldy. Statıstıkalyq málimetterge súıener bolsaq, Zıdan kelgeli «Real» nebári eki oıynda ǵana jeńilis tapqan.Amerıka kýbogy
Amerıka kýbogynyń 100 jyldyq mereıtoıyna oraı merziminen buryn uıymdastyrylǵan týrnırde Chılı komandasy kezekti ret jeńiske jetti. 2015 jyly dál osy týrnırdiń fınalynda Chılıden, 2014 jyly álem chempıonatynyń aqtyq oıynynda Germanııadan utylǵannan keıin Lıonel Messı bastaǵan Argentına ulttyq quramasy o bastan-aq favorıt retinde eseptelgen. Biraq fýtboldyń qyzyǵy sol - kimniń chempıon bolatynyn aldyn ala boljap bilý múmkin emes. Fınaldyq oıyn dál 2015 jylǵydaı órbidi. Kezdesýdiń negizgi ýaqyty men over-taımda esep ashylmaı, penaltı serııasynda argentınalyqtar taǵy da múlt ketti. Argentınamen baǵy janbaǵan Lıonel Messı ulttyq quramada mansabyn aıaqtaǵany týraly málimdegen. Biraq týǵan eline degen súıispenshiliginiń arqasynda arada birer aı ótpesten «albıseleste» ujymyna qaıta oraldy.Eýropa chempıonaty
Tórt jylda bir ret uıymdastyrylatyn dúbirli doda bıyl Fransııada ótti. Portýgalııa quramasy óz tarıhynda alǵash ret chempıon atandy. 2008 jyldyń qyrkúıeginde ÝEFA atqarýshy komıtetiniń sheshimimen Eýro 2016-dan bastap qatysýshy komandalar sany 24-ke kóbeıetin bolyp sheshim qabyldanǵan edi. Mine, dál osy sheshim portýgaldarǵa orasan zor paıdasyn tıgizdi. Sebebi, toptyq kezeńde 3-oryn alǵandarymen, qosymsha statıstıkasyna baılanysty pleı-off kezeńine joldama aldy. Eger bul jaıt 2012 jyly tirkelgende týrnırmen toptyq kezeńde-aq qoshtasar ma edi. Jalpy alǵanda, Fernandý Santýsh shákirtteri sylbyr oıynymen mundaı jetistikke jetedi degenge sený qıyn bolatyn. Sebebi, toptyq kezeńniń úsh kezdesýinde de teń esep tirkeldi. Al 1/8 fınalda horvattarǵa tek 117-mınýtta jeńis golyn soqsa, shırek fınalda polıaktardy penaltı serııasy arqyly utty. Jartylaı fınalda ǵana Ýels quramasyn negizgi ýaqytta ári senimdi túrde 2:0 esebimen utty. Parıjde ótken týrnır ıelerine qarsy match portýgaldar úshin asa aýyr boldy. Komandanyń júgin arqalaǵan Krıshtıaný Ronaldý alǵashqy taımnyń basynda-aq jaraqatyna baılanysty alańnan ketýine májbúr boldy. Budan keıin qorǵanysta saq oınap, barynsha jınaqylyq tanytty. Al alańǵa tyńnan qosylǵan Eder ekstra-taımda jalǵyz goldy salyp, óz eliniń Eýropa chempıonatyndaǵy alǵashqy jeńisine septigin tıgizdi. Bir aıta keterligi, Islandııa quramasynda tanymal bir de bir oıynshy bolmaǵanyna qaramastan Eýropany dúr silkindirip, naǵyz sensasııa jasaı bildi. Toptyq kezeńnen 5 upaımen pleı-off kezeńine ótip, 1/8 fınalda azýly Anglııany 2:1 esebimen utty. Biraq shırek fınalda fransýzdarda 2:5 esebimen ese jiberdi.Brazılııa ulttyq quramasy
«Pentakampeonder» bıyl Olımpıada oıyndarynyń altynyna basa mán berdi. Amerıka kýbogy dodasyna talantty fýtbolshysy Neımardy qospaǵanynyń basty sebebi de osy bolatyn. О́z elinde ótken jarysta brazılııalyqtar fınalda Germanııany 1:1 (penaltı 5:4) esebimen utyp, tarıhynda alǵashqy altyn medaldaryna qol jetkizdi. 27-mınýtta komanda kapıtany Neımar esep ashsa, 59-mınýtta Maksımılıana Meıera tarazy basyn teńestirdi. Al penaltı serııasynda týrnır qojaıyndarynyń baǵy jandy.«Shapekoense»
Qarasha aıynyń sońynda jahandy dúr silkindirgen qaıǵyly jaǵdaı boldy. Brazılııanyń «Shapekoense» komandasy mingen ushaǵy Kolýmbııa jerinde apatqa ushyrady. Charterlik reıske mingen 71 jolaýshynyń tek altaýy ǵana aman qaldy. Onyń úsheýi atalǵan klýbtyń oıynshylary: Alan Rýshel, Djekson Folman jáne Helıo Samper Neto. Helıo Sampero Netonyń jaraqaty aýyr emes, jaqynda alańǵa qaıta oralýy múmkin. Aýyr jaraqat alǵan Alan Rýsshel alǵashynda julynyna zaqym kelgendikten alǵashynda sal aýrýyna ushyrap, múgedek arbasyna tańylady degen aqparat taraǵan. Biraq birer apta buryn qaıyrymdylyq matchynda alańǵa shyqty. Al qaqpashy Jakson Folmannyń oń aıaǵynan aıryldy.«Altyn dop»
Eýropanyń úzdik fýtbolshylaryna beriletin nagrada 1956 jyldan beri uıymdastyrylyp keledi. Bıyl Madrıdtiń «Realynda» óner kórsetetin portýgalııalyq Krıshtıaný Ronaldý «Altyn dop» júldesinde 745 upaımen jeńiske jetti. France Football basylymynyń syılyǵyna barlyǵy 30 fýtbolshy úmitker atanǵan. Jeńimpaz sport jýrnalısteri arasynda daýys berý arqyly anyqtaldy. Osylaısha, 31 jastaǵy fýtbolshy óz mansabynda tórtinshi «altyn dobyna» qol jetkizip otyr. Ekinshi orynǵa argentınalyq Lıonel Messı (316 upaı) jaıǵassa, úshtikti «Atletıko» klýbynyń forvardy Antýan Grızmann (198 upaı) túıindedi. Aıta keteıik, 2010-2015 jyldar aralyǵynda FIFA (Halyqaralyq fýtbol federasııasy) men fransýz basylymy jyldyń úzdik oıynshysyn ulttyq quramalar kapıtandarynyń, bas jattyqtyrýshylarynyń, sondaı-aq jýrnalısterdiń daýys berýi arqyly anyqtaǵan. Uıymdastyrýshylyq jumystarymen atalǵan federasııa aınalyssa, nagrada «FIFA-nyń altyn doby» dep atalǵan. Bıyl kelisim ýaqyty aıaqtalyp, is-sharany France Football tolyǵymen óz moınyna aldy. Daıyndaǵan Aıan Ábdýálı